លោកស្រី ឱ វណ្ណឌីន អ្នកនាំពាក្យ និងជារដ្ឋលេខាធិការក្រសួងសុខាភិបាល បានបញ្ជាក់នៅរសៀលថ្ងៃនេះថា វ៉ាកសាំងដែលកម្ពុជាទទួលបានពីកូវ៉ាក់ គឺជាប្រភេទវ៉ាក់សាំងដែលមានឈ្មោះថា “COVISHIELD” ដែលផលិតនៅឥណ្ឌា ដែលគ្រាន់តែទទួលបានអាជ្ញាបណ្ណពីក្រុមហ៊ុន AstraZeneca របស់អង់គ្លេសប៉ុណ្ណោះ។
លោកស្រីបានបន្តថា តាមការបញ្ជាក់ពីអង្គការសុខភាពពិភពលោក មកទល់ពេលនេះ គេបានចែកចាយវ៉ាក់សាំង COVISHIELD នេះ នៅលើសាកលលោក ដល់ប្រទេសកំពុងអភិវឌ្ឍ មានជាង ៥០០លានដូស គឺ មិនទាន់មានប្រតិកម្ម ឬមានបញ្ហាធំដុំនោះទេ។ ហើយម្យ៉ាងទៀត វ៉ាក់សាំងដែលយើងកំពុងប្រើប្រាស់មិនមែនជាវ៉ាក់សាំងដែលមានបញ្ហានៅអឺរ៉ុបនោះឡើយ។
សូមបញ្ជាក់ថា ការចេញបំភ្លឺរបស់អ្នកនាំពាក្យក្រសួងសុខាភិបាលនៅពេលនេះ គឺក្រោយមានការព្រួយបារម្ភ បន្ទាប់ពីប្រទេសមួយចំនួននៅអឺរ៉ុប ក៏ដូចជាប្រទេសថៃដែលក្បែរខាងកម្ពុជា បានប្រកាសឲ្យផ្អាកការចាក់វ៉ាក់សាំង AstraZeneca ក្រោយពីវាបានបង្កឱ្យមានកំណកឈាមនៅក្នុងសរសៃឈាម ពេលចាក់ជូនប្រជាជននៅប៉ែកអឺរ៉ុប៕