រូបសំណាកបង្កង និងពងទាកូន ដែលជាផលិតផលមានឈ្មោះល្បីល្បាញប្រចាំខេត្តតាកែវ គ្រោងនឹងសាងសង់នៅពេលឆាប់ៗនេះ ដើម្បីបង្ហាញពីសក្ដានុពលនៅក្នុងខេត្តតាកែវ។
រូបសំណាកបង្កងដ៏ធំ នឹងត្រូវគេសាងសង់នៅផ្លូវចូលទៅទីរួមខេត្តតាកែវ ត្រង់ចំណុចបឹងអូរចំបក ដែលស្ថិតនៅភូមិខ្សឹង សង្កាត់រកាក្នុង ក្រុងដូនកែវ ខេត្តតាកែវ ។
លោក អ៊ូច ភា អភិបាលខេត្តតាកែវ បានថ្លែងប្រាប់បណ្តាញព័ត៌មានក្នុងស្រុកថា ការកសាងរូបសំណាកបង្កងនៅត្រង់ចំណុចផ្លូវចូលទៅទីរួមខេត្តតាកែវនេះ ព្រោះថាខេត្តតាកែវ គឺជាខេត្តដែលមានម្ហូបល្បីឈ្មោះ គឺបង្កងធម្មជាតិ ហើយជាខេត្តដែលល្បីទូទាំងប្រទេសផងដែរ។ ម្យ៉ាងទៀតបងប្អូនប្រជាពលរដ្ឋដែលពួកគាត់ធ្វើដំណើរឆ្លងកាត់ ឬទៅលេងខេត្តតាកែវ គឺនឹកឃើញម្ហូបមុនគេ គឺបង្កងធម្មជាតិដែលមានរស់ជាតិឆ្ងាញ់ពិសារ និងពងទាកូន ។
យ៉ាងណាក៏ដោយបច្ចុប្បន្នរដ្ឋបាលខេត្តកំពុងកៀងគរសប្បុរសជន ដើម្បីចូលរួមឧបត្ថម្ភគាំទ្ររៀបចំសាងសង់៕