កោះកុង – ករណីឈ្មួញចាក់ដីលុបព្រៃកោងកាង ស្ថិតនៅភូមិទួលគគីរក្រោម ឃុំទួលគគីរ ស្រុកមណ្ឌលសីមា ដើម្បីយកពុះជាដីឡូត៍ទុកលក់នោះ ឥឡូវនេះ អភិបាលខេត្តកោះកុង បានចេញលិខិតផ្លូវការ ឲ្យឈ្មួញដែលគេដឹងថា គឺលោកស្រី លាង ហ៊ីម ហៅម៉ាហ្គោល កាយអាចម៍ដីចេញវិញឲ្យ ដោយទុករយៈពេលយូរបំផុតត្រឹម៧ថ្ងៃ ព្រមទាំងត្រូវតែធ្វើការស្តារព្រៃកោងកាងដែលខូចខាតឲ្យមានសភាពដើមឡើងវិញ។
ដោយឡែកចំពោះការអះអាងរបស់លោកស្រីដែលថា បានទិញដីនេះពីប្រជាពលរដ្ឋ (ដីសហគមន៍) ក្រុមការងាររបស់រដ្ឋបាលខេត្តនឹងចុះសិក្សាសាវតាលម្អិត ថាតើដីកម្មសិទ្ធិរបស់ពលរដ្ឋ ឬជាការចាត់ចែងរបស់អាជ្ញាធរឃុំ ហើយមានប្រយោជន៍អ្វីខ្លះដល់សហគមន៍ ។
គួរបញ្ជាក់ថា កាលពីពេលថ្មីៗនេះ ដីព្រៃកោងកាងទំហំប្រមាណ ៤ពាន់ម៉ែត្រក្រឡា ត្រូវបានអ្នកមានលុយប្រើប្រាស់រថយន្តដឹកដីមកចាក់បំពេញ ដើម្បីព័ទ្ធយកធ្វើជាកម្មសិទ្ធិ ធ្វើឲ្យមានការភ្ញាក់ផ្អើលដល់បណ្តាញសារព័ត៌មានក្នុងខេត្តចុះទៅផ្តិតយករូបភាព ខណៈដែលអាជ្ញាធរមូលដ្ឋានហាក់មិនបានដឹងរឿងសោះ។
យ៉ាងណាក៏ដោយ បើតាមលោក សុខ សុទ្ធី អភិបាលរងខេត្តកោះកុង ថា ទោះបីជាដីធ្លីមួយចំនួននៅក្នុងស្រុកមណ្ឌលសីមាស្ថិតនៅក្នុងតំបន់សហគមន៍ក៏ដោយ ក៏ពុំអាចមានបុគ្គលណាម្នាក់ចេះតែរំលោភបំពានមកប្រើប្រាស់ដើម្បីតែប្រយោជន៍ឯកជនម្នាក់ៗបានឡើយ ហើយប្រសិនបើចង់កែច្នៃដីយកធ្វើកសិកម្ម ឬធ្វើអាជីវកម្ម គឺចាំបាច់ធ្វើសំណើរឲ្យច្បាស់លាស់មកកាន់រដ្ឋបាលខេត្តពិនិត្យមុននឹងសម្រេចអនុញ្ញាត៕