(ភ្នំពេញ) – ក្រសួងចំនួន២នៅថ្ងៃនេះ គឺក្រសួងសេដ្ឋកិច្ច និងធនាគារជាតិ នៃកម្ពុជា បានចេញប្រកាសរួមគ្នាមួយ ដោយធ្វើការអំពាវនាវដល់ក្រុមហ៊ុនអភិវឌ្ឍន៍អចលនវត្ថុទាំងអស់ អនុគ្រោះដល់អ្នកទិញអចលនវត្ថុក្នុងបុរី និងអគារសហកម្មសិទ្ធិនានា ដោយបន្ធូរបន្ថយលក្ខខណ្ឌបង់រំលោះ និងលើកលែងចំពោះការផាកពិន័យ។
តាមប្រកាសរួមនោះ ក្រសួងទាំងពីរបានអំពាវនាវចំនួន ៥ចំណុចដល់ម្ចាស់បុរី ដោយក្នុងនោះរួមមាន៖
១៖ ពិនិត្យពីលទ្ធភាពបន្ធូរបន្ថយ លក្ខខណ្ឌបង់រំលស់ ទៅតាមស្ថានភាពជាក់ស្តែងរបស់អតិថិជន
២៖ លើកលែង ការផាកពិន័យ ចំពោះអ្នកទិញអចលនវត្ថុក្នុងបុរី និងអគារសហកម្មសិទ្ធិនានា ក្នុងករណីដែលអ្នកទិញយឺតយ៉ាវ មិនបានបង់ប្រាក់តាមកាលកំណត់
៣៖ មិនត្រូវមានបន្ទុកការប្រាក់ ឬជាប់ការពិន័យបន្ថែម ចំពោះការយឺតយ៉ាវក្នុងការបង់ប្រាក់រំលស់
៤៖ ដាក់ចេញនូវគោលនយោបាយគាំពារនានា ដល់អតិថិជនរបស់ខ្លួន លើការបង់រំលស់អចលនវត្ថុក្នុងបុរី និងអគារសហកម្មសិទ្ធិនានា និង
៥៖ អនុវត្តវិធានការទាំងនេះ ឲ្យមានប្រសិទ្ធភាព រហូតដល់ដំណាច់ខែមីនា ឆ្នាំ២០២២។
