អ្នករកស៊ីវេលុយនៅភូមិតាមូង ឃុំព្រៃផ្គាំ ស្រុកអង្គរបូរី បានបាត់បង់លុយអស់ជិត១ម៉ឺនដុល្លារ ក្រោយពីមានជនសង្ស័យចូលមកវេលុយ រួចក៏ដាក់ថ្នាំយកលុយទៅអស់ដោយសុវត្ថិភាព។
ផ្ទះវេលុយដែលត្រូវគេចូលដាក់ថ្នាំយកលុយអស់នៅភូមិតាមូង ឃុំព្រៃផ្គាំ ស្រុកអង្គរបូរី ខេត្តតាកែវ
ករណីនេះ បានកើតឡើងកាលពីវេលាម៉ោងប្រមាណ៩ព្រឹក ថ្ងៃទី២៩ ខែមីនា ឆ្នាំ២០២១កន្លងទៅនេះ។
ជនរងគ្រោះត្រូវបានបញ្ជាក់ថា មានឈ្មោះ លូ ស្រីទូច ភេទស្រី អាយុ២៧ឆ្នាំ , មុនពេលកើតហេតុ មានបុរសម្នាក់បានជិះម៉ូតូ១គ្រឿងមិនស្គាល់ម៉ាក ដោយពាក់ម៉ាស់ជិត បានមកវេលុយចំនួន២០មុឺនរៀល ក្រោយមកស្រ្តីរងគ្រោះបានចាក់សោទូហើយយកលុយពីជនសង្ស័យ តែត្រូវជនសង្ស័យចាប់ដៃ ហើយពេលនោះ ស្ត្រីរងគ្រោះក៏លែងដឹងអីទាំងអស់ ហើយដល់ពេលដឹងខ្លួនមកវិញ ក៏ស្រែកឆោឡោ និងរកលុយ តែលុយបានបាត់អស់ទៅហើយ។
តាមជនរងគ្រោះថា លុយដែលបានបាត់នោះ មានលុយខ្មែរចំនួន២៣លានរៀលលុយ លុយដុល្លារចំនួន៤ពាន់ដុល្លារ។
ពាក់ពន្ធ័ករណីខាងលើនេះ លោក បុិត ប៊ុនធឿន នាយប៉ុស្ដិ៍រដ្ឋបាលឃុំព្រៃផ្គាំបានឲ្យដឹងថា ពិតជាមានករណីដាក់ថ្នាំយកលុយពីអ្នកវេលុយមែន តែសមត្ថកិច្ចនៅមិនទាន់កំណត់មុខសញ្ញាបាននៅឡើយទេ៕
