(តាកែវ) – ឧបករណ៍បំពងសម្លេងមួយចំនួនត្រូវបានកម្លាំងគណៈបញ្ជាការឯកភាពក្រុងដូនកែវចុះទៅដកហូតពេលមានមនុស្សកំពុងជួបជុំគ្នា បើកច្រៀងយ៉ាងកងរំពងកាលពីពេលថ្មីៗនេះ ស្ថិតនៅចំណុចភូមិស្នោរ សង្កាត់រកាក្នុង ក្រុងដូនកែវ។
បើទោះជាមានការហាមប្រាមពីរាជរដ្ឋាភិបាលមិនឲ្យមានការប្រមូលផ្តុំជួបជុំគ្នាយ៉ាងក៏ដោយ នៅតែមានមនុស្សដែលគេអះអាងជាបុគ្គលិកខារ៉ាអូខេមួយមានឈ្មោះ The King បានប្រព្រឹត្តផ្ទុយនិងបម្រាប ដោយបានចាក់ធុងបាស់ជួបជុំគ្នាច្រៀងរាំបំពងសម្លេងខ្លាំងៗយ៉ាងសប្បាយនៅមុខហាង។
ជុំវិញករណីនេះលោក កង អាណាន់ អភិបាលក្រុងដូនកែវបានឲ្យដឹងថា បន្ទាប់ពីទទួលបានសេចក្តីរាយការណ៍ប្រជាពលរដ្ឋភ្លាម កម្លាំងគណៈបញ្ជាការសាលាក្រុងក៏បានដាក់កម្លាំងទៅដកហូតធុងបាសយកទៅសាលាក្រុងភ្លាមៗផងដែរ ដោយរង់ចាំម្ចាស់ទៅដោះស្រាយនៅសាលាក្រុងនាពេលក្រោយ។
ចំណែកពលរដ្ឋក្បែរៗហាងខារ៉ាអូខេនេះបានឲ្យដឹងថា ការជួបជុំច្រៀងរាំបំពងសម្លេងនេះកើតមានពីរបីថ្ងៃជាប់ៗគ្នាមកហើយរហូតដល់យប់ជ្រៅទៀតផង។
ដូចគ្នានឹងករណីនេះដែរ កាលពីពេលថ្មីៗនេះ មន្រ្តីសាលាស្រុកសំរោង នៃខេត្តតាកែវចំនួន២រូប ទើបតែត្រូវបានអភិបាលស្រុកធ្វើការស្តីបន្ទោស ក្រោយពីបានចូលទៅហូបចុកនៅក្នុងហាងខារ៉ាអូខេ ធ្វើឲ្យមានការរិះគន់ពីប្រជាពលរដ្ឋ៕
