អ្នកដឹកនាំរឿង នេសាទក្រពើ និង ហ្លួងព្រះស្តេចកន ដ៏ល្បីល្បាញ គឺលោក ម៉ៅ អាយុទ្ធ បានទទួលមរណភាពហើយនៅថ្ងៃទី១៥ ខែមេសានេះ ឯមន្ទីរពេទ្យមិត្តភាពខ្មែរសូវៀត (ពេទ្យរុស្ស៉ី) ដោយសារជំងឺកូវីដ១៩។ នេះបើតាមការចុះផ្សាយរបស់បណ្តាញព័ត៌មាន Fresh News ដែលបានដកស្រង់សម្តីរបស់លោក ផុស សុវណ្ណ អគ្គនាយក នៃអគ្គនាយកដ្ឋានព័ត៌មាន និងសោតទស្សន៍ ក្រសួងព័ត៌មាន។
លោក ម៉ៅ អាយុទ្ធ មានអាយុ៧៧ឆ្នាំ រស់នៅភូមិ០៧ សង្កាត់បឹងរាំង ខណ្ឌដូនពេញ ត្រូវបានរកឃើញមានវិជ្ជមានកូវីដ១៩ កាលពីថ្ងៃទី៥ ខែមេសា ហើយត្រូវបានបញ្ជូនទៅសម្រាកនៅមន្ទីរពេទ្យមិត្តភាពខ្មែរសូវៀត។
លោក ម៉ៅ អាយុទ្ធ ត្រូវគេស្គាល់ថា ជាមន្រ្តីជាន់ខ្ពស់ម្នាក់នៅក្រសួងព័ត៌មាន និងជាផលិតករភាពយន្តដ៏ល្បីល្បាញមួយ ក្នុងចំណោមផលិតករជើងខ្លាំងដទៃទៀត ដោយមានស្នាដៃជាច្រើនក្នុងវិស័យសិល្បៈខ្មែរ ក្នុងនោះមានស្នាដៃផលិតខ្សែភាពយន្តខ្សែជាច្រើន ហើយខ្សែភាពយន្តដ៏ល្បីបីល្បាញនោះ គឺរឿង «នេសាទក្រពើ» កាលពីអំឡុងឆ្នាំ២០០៣ និងរឿង «ហ្លួងព្រះស្តេចកន» កាលពីឆ្នាំ២០១៦កន្លងទៅ៕
