កម្លាំងនគរបាលប៉ុស្តិ៍អន្តោប្រវេសន៍ច្រកទ្វារព្រំដែនអន្តរជាតិចាំយាមកាលពីថ្ងៃម្សិលមិញនេះ បានឃាត់ខ្លួនមេខ្យល់ដែលព្យាយាមលួចលាក់ដឹកជញ្ជូនពលករខុសច្បាប់ពីខេត្តត្រាត ប្រទេសថៃមកកាន់ខេត្តកោះកុង។
លោក ង៉ុយ ជៀង នាយប៉ុស្តិ៍នគរបាលអន្តោប្រវេសន៍ប្រចាំច្រកទ្វារព្រំដែនអន្តរជាតិចាំយាម បានឱ្យដឹងថា ខណៈសមត្ថកិច្ចកំពុងធ្វើការត្រួតពិនិត្យ ក៏មានការសង្ស័យទៅរថយន្តបុរសវ័យចំណាស់ម្នាក់ឈ្មោះ សេ លៀង អាយុ៦៤ឆ្នាំ ជនជាតិថៃ ទីលំនៅទីរួមខេត្តត្រាត រួចក៏បានត្រួតពិនិត្យ ហើយក៏បានឃើញថា មានការលួចលាក់រត់ពន្ធមនុស្សខុសច្បាប់១ម្នាក់ ដោយដាក់ខាងក្រោមពូករថយន្តម៉ាក់ISUO ពាក់ស្លាកលេខថ ៧៩៧៩ ពណ៍ប្រផះ។
ពលករខុសច្បាប់ដែលរកឃើញលាក់ខ្លួននៅក្នុងរថយន្តត្រូវបានបញ្ជាក់ថា មានឈ្មោះ សំរ៉ន វ៉ាន់ ឌី អាយុ៣១ឆ្នាំ ជនជាតិខ្មែរ បម្រើការងារជាពលករនៅស្រុកខ្លងយ៉ៃ ខេត្តត្រាត។
លោក ជា សារិន អធិការនគរបាលស្រុកមណ្ឌលសីមា ថ្លែងដែរថា បន្ទាប់ពីការសាកសួរ និងធ្វើកំណត់ហេតុរបស់នគរបាលអន្តោប្រវេសន៍រួចបញ្ចូនមកកាន់អធិការដ្ឋាន ហើយរូបលោកក៏បញ្ជូនខ្លួនមេខ្យល់ទៅកាន់ពន្ធនាគារបន្តរង់ចាំការអនុវត្តនីតិវិធីច្បាប់៕