(កោះកុង) – កម្លាំងចម្រុះដឹកនាំដោយលោក ណឹម ភិរម្យ អភិបាលរងស្រុកកោះកុង នៅថ្ងៃទី២៧ ខែមេសា ឆ្នាំ២០២១ បានចុះទៅធ្វើការពិនិត្យមើលទីតាំងដីចំនួន៥ទីតាំង ដែលត្រូវរាយការណ៍ថា បានកាយដីភ្នំ និងចាក់ដីរំលោភយកចំណីព្រែក ស្ថិតក្នុងភូមិសាស្រ្តភូមិអន្លង់វ៉ាក់ ឃុំតាតៃ ស្រុកកោះកុង។
ក្នុងការចុះពិនិត្យទីតាំងនេះ លោក ណឹម ភិរម្យ អភិបាលរងស្រុកកោះកុង បានរកឃើញថា ម្ចាស់ដីចំនួន៥នាក់ ដែលមានឈ្មោះ តេង ប៊ុន ម៉ម សុថាវី ប្រពន្ធលោក គិន ប៊ូកាន មន្ត្រីនៃមន្ទីរទេសចរណ៍ខេត្តកោះកុង អ៊ឹម ផល កេត សុជាតិ និង ឈ្មោះ កេត វិចិត្រ ពិតជាបានរំលោភបំពានដីព្រៃភ្នំ និងចំណីព្រែកដែលជាសម្បត្តិសាធារណៈរបស់រដ្ឋពិតប្រាកដមែន ពិសេសគឺការចាក់ដី និងកាយភ្នំខាងលើ គឺពុំមានការអនុញ្ញាតពីអាជ្ញាធរមូលដ្ឋាន និងមន្ត្រីជំនាញនោះឡើយ ។
ក្រោយការពិនិត្យក្រុមការងារបានសម្រេចអោយភាគីម្ចាស់ដីទាំង៥នាក់ខាងលើ ត្រូវរុះរើកញ្ចុះ ដែលបានសាងសង់ចូលលើចំណីព្រែកចេញទាំងអស់ ត្រូវកាយអាចម៍ដីចេញ ដោយរក្សាទុកចំណីព្រែក២០ម៉ែត្រ និងត្រូវដាំស្តាដើមឈើឡើងវិញដោយទុករយះពេល៣០ថ្ងៃ គិតចាប់ពីថ្ងៃទី២៧ ខែមេសានេះតទៅ និងមិនអនុញ្ញាតឲ្យភាគីម្ចាស់ដីខាងលើ ជីកកាយដីភ្នំ និងសាងសង់អ្វីលើចំណីព្រែកតាមចិត្តទៀតនោះទេ៕