(តាកែវ) – របងថ្មជាច្រើនកន្លែងនៅតាមដងស្ទឹងកំប៊ុត ស្ថិតក្នុងឃុំអង្គរបុរី ស្រុកអង្គរបុរី ត្រូវបានអ្នកមានលុយសង់ជាបន្តបន្ទាប់ ដោយរំលោភយកចំណីស្ទឹងធ្វើកម្មសិទ្ធ ធ្វើឲ្យលោក ឌឹម គឹម សាន អភិបាលស្រុកអង្គរបូរី មានចម្ងល់ ហើយកំពុងស៊ើបអង្កេតមន្រ្តីរបស់ខ្លួន ក្រែងមានពាក់ព័ន្ធនឹងអំពើពុករលួយ។
បើតាមសម្តីលោក ឌឹម គឹមសាន អភិបាលស្រុកអង្គរបុរីថា លោកមិនបានដឹងសោះថាមានអ្នកសង់របងថ្មស្កឹមស្កៃរំលោភយកដីស្ទឹងរបស់រដ្ឋ។ លោកថា នឹងកោះហៅម្ចាស់របងមកសាកសួរថា តើមន្ត្រីថ្នាក់ណាជាអ្នកអនុញ្ញាតិឲ្យសង់របងយកដីស្ទឹងបែបនេះ? ហើយថា លោកនឹងស៊ើបអង្កេតលើក្រុមមន្រ្តីរបស់លោកថា មានជាប់ពាក់ពន្ធ័នឹងម្ចាស់របងនេះដែរឬទេ?
ចំពោះករណីសង់របងយកដីចំណីស្ឬឹងនេះ លោក ឡេង ខូវ ប្រធានការិយាល័យភូមិបាលស្រុកអង្គរបុរីបានថ្លែងថា លោកមិនបានដឹងសោះថា មានអ្នកហ៊ានសង់របងថ្មរំលោភយកដីស្ទឹងបែបនេះ ដោយប្រហែលគេសុំច្បាប់តាមច្រក់ចេញចូលតែមួយរបស់រដ្ឋបាលស្រុកហើយមើលទៅ ព្រោះកន្លងមកពលរដ្ឋមុនសាងសង់អ្វីៗតែងតែសុំច្បាប់តាមច្រកចេញចូលតែមួយ ហើយមន្រ្តីច្រកចេញចូលមិនងាយធ្វើការឲ្យរហស័រហួនទេ គឺតែងផ្អឹបពាក្យស្នើសុំរបស់ពលរដ្ឋទុកយូរៗណាស់៕