(តាកែវ) – សមត្ថកិច្ចស្រុកព្រៃកប្បាសបានឲ្យដឹងថា នៅព្រឹកថ្ងៃទី៣០ ខែមេសា ឆ្នាំ២០២១នេះ កម្លាំងអធិការស្រុកបានចុះអន្តរាគមន៍ករណីប្រើហិង្សាក្នុងគ្រួសារ ដែលបានកើតឡើងនៅភូមិព្រៃផ្តៅត្បូង ឃុំព្រៃផ្តៅ ប៉ុន្តែក៏ស្រាវជ្រាវឃើញករណីគ្រឿងញៀនមួយករណីថែមទៀត។
ជនសង្ស័យ និងវត្ថុតាង
យោងតាមរបាយការណ៍សមត្ថកិច្ចថា ដំបូងឡើយ គឺមានករណីហិង្សាក្នុងគ្រួសារ ដែលបង្កដោយជនសង្ស័យឈ្មោះ កែវ ផាន់នឿន ហៅប៉េវ ភេទប្រុសអាយុ២៧ឆ្នាំ មុខរបរមិនពិតប្រាកដ រស់នៅភូមិកើតហេតុខាងលើ ដោយបានយកមេសោរវាយទៅលើប្រពន្ធរបស់ខ្លួនឈ្មោះ ឈុន សុីណែត ហៅមុំ អាយុ៣២ឆ្នាំ ត្រូវចំក្បាលផ្នែកខាងក្រោយបណ្ដាលឲ្យមានរបួស។
ក្រោយពីទទួលបានបណ្ដឹង កម្លាំងជំនាញរបស់អធិការដ្ឋាននគរបាលស្រុក សហការជាមួយកម្លាំងប៉ុស្ដិ៍នគរបាលរដ្ឋបាលព្រៃផ្តៅ ចុះទៅកន្លែងកើតហេតុធ្វើការស្រាវជ្រាវ និងឃាត់ខ្លួនជនសង្ស័យខាងលើជាមួយបក្ខពួកម្នាក់ទៀត ឈ្មោះ ហ៊ាន សម្ភស្ស ភេទប្រុស អាយុ២៨ឆ្នាំ មុខរបរមិនពិតប្រាកដ មានទីលំនៅភូមិគោកទ្រា ឃុំព្រៃផ្ដៅ ស្រុកព្រៃកប្បាស ដោយកម្លាំងបានដកហូតវត្ថុតាងរួមមាន៖ មេសោរមួយ , ម្សៅក្រាមពណ៌សថ្លាសង្ស័យជាសារធាតុញៀនចំនួន១១កញ្ចប់ ,កែវសម្រាប់ជក់ថ្នាំញៀនចំនួន២ ,និងទូរស័ព្ទដៃចំនួន៥គ្រឿង(ម៉ាកណូគាចុចពិល៤គ្រៀង,ម៉ាកZTEមួយគ្រឿង)។
ក្រោយការឃាត់ខ្លួន ជនសង្ស័យទាំង២នាក់ ត្រូវបាននាំមកអធិការដ្ឋាននគរបាលស្រុកព្រៃកប្បាស ដើម្បីកសាងសំណុំរឿងតាមនីតិវិធី៕
