(បាត់ដំបង) – ការិយាល័យដឹកជញ្ជូននិងផ្ញើសម្ភាររបស់ ក្រុមហ៊ុន វីរៈប៊ុន ថាំ ប្រចាំស្រុកកំរៀង ស្រុកភ្នំព្រឹក និង ស្រុកសំពៅលូន និងផ្ទះពលរដ្ឋក្បែរខាងនោះ ត្រូវបានអាជ្ញាធរសម្រេចធ្វើការបិទខ្ទប់នាព្រលប់ថ្ងៃទី០២ ខែ ឧសភា ឆ្នាំ ២០២១ បន្ទាប់ពីទទួលដំណឹងថា តៃកុង ឡានម្នាក់នៃក្រុមហ៊ុននេះមានវិជ្ជមានកូវីដ-១៩ ។
បើតាមការបញ្ជាក់របស់អាជ្ញាធរថា តៃកុងឡាន បានដឹកអីវ៉ាន់ក្នុងទិសដៅពីក្រុងប៉ោយប៉ែតខេត្តបន្ទាយមានជ័យ មកទម្លាក់នៅស្រុកជាប់ព្រំដែនទាំងបី របស់ខេត្តបាត់ដំបង និងខេត្តប៉ៃលិន ហើយត្រូវបានមន្រ្តីជំនាញនៅខេត្តប៉ៃលិនស្ទាក់ និងនាំយកទៅពិនិត្យសំណាក ហើយក៏រកឃើញមានវិជ្ជមាន កូវីដ-១៩។
តៃកុងឡានដែលមានវិជ្ជមានកូវីដ-១៩ខាងលើនេះ បានបើករថយន្តក្រុមហ៊ុនខាងលើចេញពីក្រុងប៉ោយប៉ែត មកកាត់ផ្លូវជាតិលេខ៥៩ ដោយទម្លាក់អីវ៉ាន់នៅក្បាលដំរី ម៉ាឡៃ ខេត្តបន្ទាយមានជ័យ និង ស្រុកជាប់ព្រំដែនខេត្តបាត់ដំបងមានស្រុកកំរៀង ភ្នំព្រឹក និង ស្រុកសំពៅលូន និង ខេត្តប៉ៃលិនប៉ុណ្ណោះ មិនបានបើកចូលមកការិយាល័យក្នុងកណ្តាលក្រុងបាត់ដំបងនោះទេ៕
