តាមលិខិតមួយច្បាប់ផ្ញើទៅកាន់អភិបាលខេត្តស្ទឹងត្រែង រដ្ឋបាលខេត្តព្រះសីហនុ បានបញ្ជាក់ថា មានកម្មករព្យួរកិច្ចសន្យាការងារ នៃរោងចក្រញ៉ូវស្តារ ០១នាក់ ឈ្មោះ លី សុភា ភេទស្រី កាន់អត្តសញ្ញាណប័ណ្ណលេខ ០៨០០៩៧៩១៦ បានលួចគេចវេះចេញតំបន់បិទខ្ទប់នៃខេត្តព្រះសីហនុធ្វើដំណើរទៅខេត្តស្ទឹងត្រែង (លទ្ធផលមានវិជ្ជមានកូវីដ-១៩)។
ក្នុងនោះដែរ អ្នកជំងឺរូបនេះ ក៏បានប៉ះពាល់ដោយប្រយោលជាមួយកម្មករ ដែលបានព្យួរកិច្ចសន្យាការងារជាមួយគ្នាចំនួន ២០នាក់បន្ថែមទៀត នៃរោងចក្រញ៉ូវស្តារក្នុងខេត្តព្រះសីហនុ។
ទង្វើរបស់បុគ្គលខាងលើនេះ ត្រូវរដ្ឋបាលខេត្តព្រះសីហនុ ចាត់ទុកថា គឺជាអំពើដោយចេតនាមិនគោរពវិធានការរដ្ឋបាលដែលមានចែងនៅក្នុងមាត្រា៤ និងមាត្រា១០ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត។
ក្នុងនោះ រដ្ឋបាលខេត្តព្រះសីហនុ ស្នើដល់អភិបាលខេត្តស្ទឹងត្រែង ចាត់វិធានការច្បាប់ចំពោះបុគ្គលល្មើសខាងលើឲ្យបានតឹងរ៉ឹងបំផុត៕
