បើគិតមកទល់នឹងពេលនេះ កម្ពុជាមានករណីជំងឺកូវីដ១៩សរុបចំនួនជាង ១ម៉ឺន៥ពាន់នាក់ហើយ ហើយរយៈពេលថ្មីៗចុងក្រោយនេះ ចំនួនអ្នកឆ្លងជំងឺកូវីដ១៩ថ្មី ហាក់មានចំនួនច្រើនឡើងៗស្ទើរតែរាល់ថ្ងៃ ដែលធ្វើឲ្យមហាជនខ្លះមានចម្ងល់ថា ហេតុអ្វីបានជាចំនួនអ្នកឆ្លងថ្មីកើនឡើង៣ខ្ទង់រាល់ថ្ងៃយ៉ាងដូច្នេះ?
ការយកសំណាករកវីរុសកូវីដ១៩
ចំពោះបញ្ហានេះ លោក ហុក គឹមចេង អគ្គនាយកបច្ចេកទេស នៃក្រសួងសុខាភិបាល បានបញ្ជាក់ថា មូលហេតុដែលធ្វើឲ្យតួលេខនៃឆ្លងមានការកើនឡើងនេះ គឺដោយសារតែក្រុមគ្រូពេទ្យបានប្រើម៉ាស៊ីនតេស្តរហ័ស SARS-CoV-2 Rapid Antigen Test ទៅលើអ្នកសង្ស័យថា មានផ្ទុកជំងឺកូវីដ-១៩ ដែលវាមានសមត្ថភាពអាចរកឃើញអ្នកមានវិជ្ជមាន ឫអវិជ្ជមានក្នុងរយះពេល១៥នាទី ហើយក្រោយធ្វើតេស្តរួច គឺបានបញ្ជូនវត្ថុសំណាកទៅមន្ទីរពិសោធន៍។
លោកបានបញ្ជាក់ថា ប្រជាពលរដ្ឋដែលរស់នៅតំបន់ក្រហម គឺជាតំបន់ហានិភ័យខ្ពស់ អាត្រានៃការតេស្តរកអ្នកឆ្លងវីរុសកូវីដ-១៩ មានពី១០ភាគរយ ឬលើស១០ភាគរយទៅទៀត ។
ម៉្យាងទៀត ដោយសាររាជរដ្ឋាភិបាល ពិសេសអាជ្ញាធរចេញវិធានការបិទខ្ទប់តំបន់មានហានិភ័យខ្ពស់បានទាន់ពេលវេលា ទើបយើងអាចមានលទ្ធភាពតេស្តរកអ្នកវិជ្ជមានជំងឺកូវីដ-១៩ ដើម្បីកាត់ផ្ដាច់ខ្សែចម្លងវីរុសកូវីដ-១៩ ពីមនុស្សម្នាក់ ទៅមនុស្សម្នាក់ទៀត៕
ប្រភព៖ TVK
