តាមរយៈសេចក្តីជូនដំណឹងនៅថ្ងៃនេះ ក្រសួងព័ត៌មានបានលើកឡើងថា កន្លងមកនេះ មានអ្នកសារព័ត៌មានមួយចំនួនបានចុះយកព័ត៌មាន និងធ្វើការផ្សាយផ្ទាល់ពីសកម្មភាពនានានៅតំបន់បិទខ្ទប់ ជាពិសេសនៅក្នុងតំបន់ក្រហម និងតំបន់ហាមឃាត់ដូចជា មណ្ឌលព្យាបាលជំងឺកូវីដ១៩ មន្ទីរពេទ្យ ព្រមទាំងធ្វើសកម្មភាពដេញតាមថតរថយន្តសង្រ្គោះបន្ទាន់ ដោយធ្វើការផ្សាយផ្ទាល់ ហើយធ្វើអត្តាធិប្បាយអំពីហេតុការណ៍ដែលពាក់ព័ន្ធនឹងផ្នែកបច្ចេកទេសសុខាភិបាល ព្រមទាំងធ្វើការសន្និដ្ឋានវាយតម្លៃលើបញ្ហាផ្សេងៗដោយគ្មានមូលដ្ឋានច្បាស់ ធ្វើឲ្យសាធារណជនមានការយល់ច្រឡំ បង្កភាពជ្រួលច្របល់នៅក្នុងសង្គម និងប្រឈមទៅនឹងគ្រោះថ្នាក់ នៃការឆ្លងរាលដាលជំងឺកូវីដ១៩កាន់តែធ្ងន់ធ្ងរទៅៗ។
ដូច្នេះដើម្បីរក្សាសុវត្ថិភាពសង្គម និងទប់ស្កាត់ការឆ្លងរាលដាលជំងឺកូវីដ១៩ ទៅក្នុងសហគមន៍ ក្រសួងព័ត៌មានសូមធ្វើការណែនាំដល់អ្នកសារព័ត៌មានទាំងអស់បញ្ឈប់រាល់សកម្មភាពខាងលើជាបន្ទាន់ ហើយករណីនៅតែបំពានល្មើស នឹងត្រូវទទួលខុសត្រូវចំពោះមុខច្បាប់ជាធរមាន៕
