តាមរយៈក្រុមព័ត៌មាន និងប្រតិកម្មរហ័ស នៃស្នងការដ្ឋាននគរបាលជាតិ លោក ម៉ន វុធី អធិការនគរបាលខណ្ឌពោធិ៍សែនជ័យ បានធ្វើការច្រានចោល និងបដិសេធចំពោះព័ត៌មានដែលផ្សាយថា លោកបានកិបកេងថវិការបស់មន្រ្តីក្រោមឱវាទ ដែលកំពុងអនុវត្តវិធានការបិទខ្ទប់។
បើតាមក្រុមព័ត៌មាន និងប្រតិកម្មរហ័ស នៃស្នងការដ្ឋាននគរបាលជាតិថា ដំណេីររឿងជាក់ស្តែង គឺអធិការដ្ឋាននគរបាលខណ្ឌពោធិ៍សែនជ័យ បានទទួលថវិកាពីផែនភស្តុភារ និងហិរញ្ញវត្ថុនៃស្នងការដ្ឋាននគរបាលរាជធានីភ្នំពេញ ដែលជាការឧបត្ថម្ភរបស់សាលារាជធានីភ្នំពេញ សម្រាប់ផ្តល់ជូនកងកម្លាំងអនុវត្តវិធានការបិទខ្ទប់នៅតំបន់ក្រហមរាជធានីភ្នំពេញ រយ:ពេល ១៤ថ្ងៃ ដោយក្នុងផែនការត្រូវប្រេីប្រាស់កម្លាំងខណ្ឌចំនួន ១៣០នាក់ ក្នុង ១៣គោលដៅ ជាក់ស្តែងកម្លាំងសរុបរបស់អធិការដ្ឋាននគរបាលខណ្ឌពោធិ៍សែនជ័យមានរហូតដល់ ២៤០នាក់ ហេីយកម្លាំងដែលមិនមានក្នុងផែនការក៏បានចូលរួមជួយឆ្លាស់វេនគ្នាប្រចាំការតាមគោលដៅដូចគ្នា។
ដូច្នេះហេីយទេីបពេលទទួលបានថវិកាសរុបភ្លាម លោកអធិការបានធ្វេីការកោះប្រជុំជាមួយលោកអធិការរង សួរទៅគ្រប់ប៉ុស្តិ៍ គ្រប់គោលដៅ និងមន្ត្រីផងដែរ ដេីម្បីទទួលបានការឯកភាព និងចុះសម្រុងគ្នាជាមុន មុននឹងធ្វេីការបែកចែកថវិកានេះផងដែរ ព្រោះថា ដោយការគិតគូរ និងយកចិត្តទុកដាក់របស់លោកអធិការ ក៏ដូចជាចង់ឲ្យកម្លាំងទាំងអស់ចំណុះអធិការមានការសាមគ្គីគ្នាល្អ ទេីបលោកអធិការសម្រេចចិត្តបែងចែកថវិការួមដែលបានទទួលមកនោះ ចែករំលែកពីការផ្តល់ជូនកម្លាំង ១៣០នាក់ ទៅជាការបែកចែកជូនកម្លាំងសរុបចំនួន ២៤០នាក់វិញ។
ការបែងចែកបែបនេះ ក៏ព្រោះថា កម្លាំងទាំងអស់សុទ្ធតែហត់ និងធ្វេីការដូចគ្នា បេីទទួលបានតែ ១៣០នាក់ ហេីយ ១១០នាក់ទៀតធ្វេីការដែរ តែមិនបានទទួល នោះបាតុភាពនិងកេីតមានឡេីង ហេីយប្រាកដជាមានការអាក់អន់ចិត្តមិនសប្បាយចិត្ត ព្រោះធ្វេីការដូចគ្នា ម្នាក់បាន ម្នាក់អត់បាន ដូច្នេះហេីយនេះជាហេតុផលដែលលោកអធិការសម្រេចចិត្តបែងចែកថវិកាទាំងនោះឲ្យបានដល់កម្លាំងគ្រប់ៗគ្នាទាំងអស់៕
