(តាកែវ) – ជនសង្ស័យជាមុខសញ្ញាជួញដូរ នឹងប្រើប្រាស់គ្រឿងញៀនចំនួន២នាក់ ត្រូវបានសមត្ថកិច្ចនគរបាល ស្រុកគីរីវង់ ចាប់ឃាត់ខ្លួន រួមនឹងថ្នាំញៀន ចំនួន០៤កញ្ចប់។
ការចុះបង្រ្កាបនេះបានធ្វើឡើង នៅព្រឹកថ្ងៃទី០៥ ខែឧសភា ឆ្នាំ២០២១ ស្ថិតនៅផ្ទះរបស់ឈ្មោះសៀន ថន នៅក្នុងភូមិភ្ងាស ឃុំអង្គប្រាសាទ ស្រុកគីរីវង់ ខេត្តតាកែវ។
លោក យ៉ុគ សារ៉ាត់ អធិការនគរបាលស្រុកគីរីវង់ បានឲ្យដឹងថា ដោយការសម្របសម្រួលពីព្រះរាជអាជ្ញាអមសាលាដំបូងខេត្តតាកែវ លោកបានដឹកនាំកម្លាំងជំនាញចុះល្បាតក្នុងភូមិសាស្រ្ត លុះមកដល់ចំណុចផ្ទះរបស់ឈ្មោះ សៀន ថន ស្ថិតភូមិភ្ងាស ឃុំអង្គប្រាសាទ ស្រុកគិរីវង់ ខេត្តតាកែវ ក៏បានប្រទះឃើញសង្ស័យ២នាក់កំពុងជួញដូរចែកចាយនូវសារធាតុញៀន ភ្លាមនោះសមត្ថកិច្ចយើងធ្វើការឃាត់ខ្លួនសួរនាំ និងឃាត់ខ្លួនតែម្តង។
ជនសង្ស័យទី១.ឈ្មោះ រ័ត្ន អូរ ភេទប្រុស អាយុ១៦ឆ្នាំមានទីលំនៅភូមិពោធិ៍ ឃុំព្រះបាទជាន់ជុំ ស្រុកគិរីវង់ ខេត្តតាកែវ(ជាមុខសញ្ញាធ្លាប់ជាប់ពន្ទនាគារ០១លើកក្នុងឆ្នាំ២០១៩)។ ជនសង្ស័យទី២.ឈ្មោះស៊ាប ហេង ភេទប្រុស អាយុ ១៥ឆ្នាំ មានលំនៅភូមិពោធិ៍ ឃុំព្រះបាទជាន់ជុំ ស្រុកគិរីវង់ ខេត្តតាកែវ(ជាមុខសញ្ញាប្រើប្រាស់)។
ក្នុងពេលឃាត់ខ្លួនរកឃើញម្សៅក្រាមថ្លាពណ៍ចំនួន០៤កញ្ចាប់តូចនិងទូរស័ព្ទដៃចំនួន០២គ្រឿងនិងកូនសោមួយចំនួន៕
