តាមសេចក្តីសម្រេចមួយរបស់រដ្ឋបាលរាជធានីភ្នំពេញ ដែលទើបចេញផ្សាយនៅល្ងាចថ្ងៃទី៥ ខែឧសភា ឆ្នាំ២០២១នេះ បានធ្វើការបែងចែក តំបន់ក្រហម, តំបន់លឿងទុំ និង តំបន់លឿង សម្រាប់រយៈពេល៧ថ្ងៃ ដោយគិតចាប់ពីម៉ោងសូន្យ ថ្ងៃទី៦ ខែឧសភា ឆ្នាំ២០២១ រហូតដល់ថ្ងៃទី១២ ខែឧសភា ឆ្នាំ២០២១។
បើតាមសេចក្តីសម្រេចនោះ តំបន់ក្រហម គឺគេឃើញស្ថិតនៅក្នុងខណ្ឌចំនួន៦ ដែលរួមមាន៖
ទី១៖ ខណ្ឌ៧មករា៖ នៅប្លុកបុរីកីឡា ចំនួន៨អគារ ក្នុងសង្កាត់វាលវង់
ទី២៖ ខណ្ឌទួលគោក៖ នៅក្នុងភូមិ២៣ នៃសង្កាត់បឹងកក់ទី២, ភូមិ១០ ភូមិ១៤ និងផ្នែកខ្លះនៃភូមិ១៦ ក្នុងសង្កាត់បឹងសាឡាង, ភូមិ១ ២ ៣ ៤ ៥ ៦ ៧ ក្នុងសង្កាត់ផ្សារដើមគ
ទី៣៖ ខណ្ឌមានជ័យ៖ ផ្នែកខ្លះនៃភូមិទ្រា និងផ្នែកខ្លះនៃភូមិថ្មី ក្នុងសង្កាត់ស្ទឹងមានជ័យទី១, ភូមិដំណាក់ធំ៤ និងផ្នែកខ្លះនៃភូមិភ្នាត់ ក្នុងសង្កាត់ស្ទឹងមានជ័យទី២, ផ្នែកខ្លះនៃភូមិទ្រា៤ ផ្នែកខ្លះនៃភូមិដំណាក់ធំ២ ផ្នែកនៃភូមិដំណាក់ធំ៣ និងផ្នែកខ្លះនៃភូមិដំណាក់ធំ៥ សង្កាត់ស្ទឹងមានជ័យទី៣
ទី៤៖ ខណ្ឌឫស្សីកែវ៖ ភូមិទួលសង្កែ ភូមិចុងខ្សាច់ និងភូមិបាក់ទូក ក្នុងសង្កាត់ទួលសង្កែទី១
ទី៥៖ ខណ្ឌពោធិ៍សែនជ័យ៖ ភូមិត្រពាំងថ្លឹង១ ២ ៣ ៤ និងភូមិទួលពង្រ ក្នុងសង្កាត់ចោមទី១, ភូមិព្រៃកោង ក្នុងសង្កាត់ចោមចៅទី២
ទី៦៖ ខណ្ឌច្បារអំពៅ៖ ផ្នែកខ្លះនៃភូមិដើមចាន់ ក្នុងសង្កាត់ច្បារអំពៅទី២។
សូមបញ្ជាក់ថា «តំបន់ក្រហម» គឺសំដៅដល់ភូមិសាស្រ្តដែលមានការឆ្លងរាលដាលធ្ងន់ធ្ងរ នៃជំងឺកូវីដ១៩ ក្នុងសហគមន៍ ដែលពលរដ្ឋរស់នៅក្នុងតំបន់នេះ ត្រូវបានហាមឃាត់ការចាកចេញពីលំនៅដ្ឋាន ឬ ទីសំណាក់បច្ចុប្បន្នរបស់ខ្លួន រួមទាំងការមិនអនុញ្ញាតឲ្យធ្វើសកម្មភាពកីឡានៅខាងក្រៅលំនៅដ្ឋាន។
«តំបន់លឿងទុំ» សំដៅដល់ភូមិសាស្រ្តដែលមានការឆ្លងរាលដាលកម្រិតមធ្យម នៃជំងឺកូវីដ១៩ក្នុងសហគមន៍ ដោយបុគ្គលគ្រប់រូបត្រូវហាមឃាត់មិនឲ្យធ្វើដំណើរ ចេញពីលំនៅដ្ឋាន ឬទីសំណាក់បច្ចុប្បន្នរបស់ខ្លួន លើកលែងតែការធ្វើដំណើរទៅប្រកបមុខរបរ ឬអាជីវកម្ម ឬបំេពេញការងារក្នុងវិស័យឯកជន ដោយត្រូវមានលិខិតអនុញ្ញាតធ្វើដំណើរពីរដ្ឋបាលរាជធានីភ្នំពេញ អមដោយឯកសារបញ្ជាក់អត្តសញ្ញាណ និងលិខិតបញ្ជាក់ការងារ។
«តំបន់លឿង» សំដៅដល់ភូមិសាស្រ្តដែលមានការឆ្លងរាលដាលកម្រិតស្រាល នៃជំងឺកូវីដ១៩ ក្នុងសហគមន៍ ដែលត្រូវបានអនុញ្ញាតឲ្យធ្វើចរាចរណ៍ធម្មតា តែមិនអនុញ្ញាតឲ្យចេញចូលតំបន់ក្រហម និងតំបន់លឿងទុំ ។ ដោយឡែកការចេញទៅក្រៅភូមិសាស្រ្តរាជធានីភ្នំពេញ ត្រូវអនុវត្តតាមសេចក្តីណែនាំលេខ០៣ សណន ចុះថ្ងៃទី៤ ខែឧសភា ឆ្នាំ២០២១ របស់រាជរដ្ឋាភិបាលកម្ពុជា ស្តីពីការពង្រឹងការអនុវត្តវិធានការចាំបាច់មួយចំនួន ដើម្បីទប់ស្កាត់ការឆ្លងរាលដាល នៃជំងឺកូវីដ១៩។