(ភ្នំពេញ) – យោងតាមផែនការយុទ្ធនាការជាតិចាក់វ៉ាក់សាំងបង្ការជំងឺកូវីដ១៩ រាជរដ្ឋាភិបាលកម្ពុជារំពឹងថា នឹងអាចស្វែងរកវ៉ាក់សាំងចាក់ជូនពលរដ្ឋទូទាំងប្រទេសឲ្យរួចរាល់នៅក្នុងឆ្នាំ២០២២ខាងមុខ។
យ៉ាងណាក៏ដោយ ពេលនេះ រាជរដ្ឋាភិបាលកំពុងតែដំណើរការចាក់វ៉ាក់សាំងសម្រាប់តំបន់អាទិភាពខ្ពស់ អនុលោមតាមអភិក្រម «ផ្ការីក» ដោយចាប់ផ្តើមពីរាជធានីភ្នំពេញ ដែលជាបេះដូង នៃប្រទេស ហើយពង្រីកចេញទៅតាមភាពសំខាន់ នៃតំបន់ និងភាពប្រទាក់ក្រឡាគ្នា នៃសង្គម-សេដ្ឋកិច្ច នៅក្នុងតំបន់អាទិភាពខ្ពស់ទាំងអស់។
ក្នុងនោះជាជំហានទី១ ពីខែឧសភា ដល់ពាក់កណ្តាលខែកក្កដា ការចាក់វ៉ាក់សាំងនឹងផ្តោតលើក្រុមប្រជាជនចាប់ពីអាយុ១៨ឆ្នាំឡើងទៅ ដែលធ្វើការ និងរស់នៅរាជធានីភ្នំពេញ និងខេត្តកណ្តាល ដែលមានសរុបជិត ២លាន៥សែននាក់ ដោយត្រូវការវ៉ាក់សាំងជិត៥លានដូស។
ជំហានទី២ ពីពាក់កណ្តាលខែកក្កដា ដល់ខែកញ្ញា ផ្តោតលើក្រុមប្រជាជន ធ្វើការ និងរស់នៅក្នុងខេត្តចំនួន១១ គឺខេត្តតាកែវ កំពង់ស្ពឺ កំពង់ឆ្នាំង កំពង់ចាម ព្រៃវែង ក្រុងព្រះសីហនុ ស្វាយរៀង សៀមរាប បន្ទាមានជ័យ កែប និងកំពត។
ជំហានទី៣ ពីខែតុលា ដល់ខែវិច្ឆិកា ផ្តោតលើក្រុមប្រជាជនដែលធ្វើការ និងរស់នៅខេត្តចំនួន ១២ មានខេត្តកោះកុង ឧត្តរមានជ័យ ប៉ៃលិន ពោធិ៍សាត់ បាត់ដំបង ស្ទឺងត្រែង ត្បូងឃ្មុំ រតនគិរី ព្រះវិហារ កំពង់ធំ ក្រចេះ និងមណ្ឌលគិរី៕
