(តាកែវ) – កាលពីពេលថ្មីៗនេះ លោក ឌឹម គឹមសាន្ត អភិបាលស្រុកអង្គរបូរី បានដឹកនាំកម្លាំងចម្រុះ ចុះទៅធ្វើការរុះរើរបង និងសំយ៉ាបផ្ទះរបស់ប្រជាពលរដ្ឋ នៅជាប់ជើងភ្នំដា ស្ថិតនៅក្នុងភូមិព្រែកតាផ ឃុំព្រែកផ្ទោល ស្រុកអង្គរបូរី ដោយសារតែសំណង់របស់ពលរដ្ឋដែលរស់នៅប្រមាណ៤០ឆ្នាំមកនោះ បានបំពានទៅលើដីភ្នំរបស់រដ្ឋ។
បើតាមប្រជាពលរដ្ឋថា នៅពេលចុះមកដល់នោះ កម្លាំងប៉ូលិសជាច្រើននាក់ បានមកកាប់ និងរុះរើរបងផ្ទះរបស់ពួកគាត់ ដោយថា ពួកគាត់បានរស់នៅ និងសង់សំណង់លើដីរបស់រដ្ឋ ខណៈដែលទីតាំងនេះ ពួកគាត់រស់នៅតាំងពីដូនតាមកម្ល៉េះ។
ប្រជាពលរដ្ឋលើកឡើងថា អ្នករស់នៅជុំវិញប្រាសាទភ្នំដា សុទ្ធតែរស់លើដីរដ្ឋទាំងអស់ ហើយបើរដ្ឋត្រូវការពួកគាត់ប្រគល់ឲ្យ តែសុំអោយស្មើភាពគ្នា ដោយកុំមកដេញគ្រួសាក្រីក្រ ហើយប្រមូលទុកតែគ្រួសាអ្នកមានលុយនោះ។
តួយ៉ាង ដូចជាករណី លោក នាង សុខុម ប្រធានការិយាល័យគយ និងរដ្ឋករច្រកទ្វេភាគីបាក់ដៃ ដែលជាអ្នកមានលុយបានទៅសង់សំណង់ផ្ទះលម្ហែលើដីភ្នំបុរី តាំងពីជើងភ្នំដល់កំពូលភ្នំ តែអាជ្ញាធរមិនបានចុះទៅធ្វើការរុះរើនោះទេ ដែលប្រហែលមកពីលោកមេគយរូបនេះ មានលុយ និងជិតស្និទ្ធជាមួយលោកចៅហ្វាយស្រុក ដោយតាមប្រភពខ្លះថា ពួកគេគឺជាមិត្តភក្តិជិតស្និទ្ធទៀតផង ទើបបានជាលោកចៅហ្វាយស្រុកមិនហ៊ាន គឺហ៊ានតែជាមួយអ្នកក្រតូចតាចគ្មានលុយ គ្មានអំណាចនោះ។
យ៉ាងណាក៏ដោយ ចំពោះករណីចុះទៅរុះរើ និងវាយរបងផ្ទះប្រជាពលរដ្ឋនៅជើងភ្នំដាកាលពីពេលថ្មីៗនេះ លោក ឌឹម គឹមសាន្ត អភិបាលស្រុកអង្គរបូរី បានថ្លែងថា ករណីនេះ លោកបានជូនដំណឹងទៅពលរដ្ឋ២ ឬ៣គ្រួសារខាងលើរួចហើយថា មិនឲ្យសង់កូនផ្ទះ ឬសង់ផ្ទះរឹងមាំឡើយ តែពលរដ្ឋទាំងនោះមិនស្ដាប់ ទើបលោកប្រើប្រាស់កម្លាំងចម្រុះចុះទៅចាត់វិធានការតែម្ដងទៅ។
ចំណែកករណីសំណង់របស់លោក នាង សុខុម ដែលសង់នៅភ្នំបូរីលើដីរដ្ឋដូចគ្នា តែលោកអភិបាលស្រុកមិនព្រមចាត់វិធានការនោះ យើងមិនអាចសុំការអត្ថាធិប្បាយបានឡើយ, តែយ៉ាងណាកន្លងមកលោក ឌឹម គឹមសាន្ត ធ្លាប់បានបញ្ជាក់ថា ដីនៅជើងភ្នំបូរីនោះ គឺជាដីរបស់រដ្ឋ មិនទាន់មានការកាត់ខ្វៀលឲ្យប្រជាពលរដ្ឋណាម្នាក់ធ្វើកម្មសិទ្ធិឡើយ៕