ក្រោយពីមានការផ្សព្វផ្សាយថា វត្ថុបុរាណដែលអ្នកនេសាទសមុទ្រម្នាក់បានស្រង់ពីទឹកសមុទ្រ ហើយត្រូវអាជ្ញាធរយកពីផ្ទះរបស់គាត់ទៅរក្សាទុក ដែលពេលនេះលឺដំណឹងថា បាត់មិនដឹងទៅណានោះ ឥឡូវអភិបាលខេត្តកែប បានចេញមកធ្វើការបកស្រាយថា វត្ថុបុរាណមួយនេះ មិនបានបាត់ទៅណាទេ គឺវាកំពុងរក្សាទុកនៅសារមន្ទីរ។
លោក សោម ពិសិដ្ឋ អភិបាលខេត្តកែប បានថ្លែងប្រាប់សារព័ត៌មានក្នុងស្រុកថា រូបចម្លាក់នោះមិនបានបាត់ទៅណានោះទេ ពេលនេះកំពុងរក្សាទុកក្នុងសារមន្ទីរខេត្ត ហើយដែលថា រូបចម្លាក់នេះតម្លៃ៤០ម៉ឺនដុល្លារ គ្រាន់តែជាការបំប៉ោងព័ត៌មានតែប៉ុណ្ណោះ។
លោកថា ដោយមានការភ្ញាក់រលឹកពីសំណាក់ប្រជានេសាទ ក្រោយរើសបានរូបចម្លាក់នេះពីក្នុងសមុទ្រ ពួកគាត់បានយកមកប្រគល់ជូនលោកក្នុងនាមលោកជាអាជ្ញាធរដើម្បីថែរក្សាទុក។ ក្រោយពីទទួលបានពីបងប្អូនប្រជាពលរដ្ឋ លោកបានយករូបចម្លាក់នេះ ទៅរក្សាទុកក្នុងសារមន្ទីរខេត្តហើយដែរ។
«ចំពោះការបំប៉ោងព័ត៌មានថារូបចម្លាក់នេះមានតម្លៃប៉ុណ្ណេះប៉ុណ្ណោះ ជារឿងរបស់អ្នកថា តាមពិតរូបចម្លាក់នេះ យើងមិនទាន់ស្គាល់ថា ជារូបអ្វីឲ្យពិតប្រាកដ ជាវត្ថុបុរាណ ឬក៏មិនមេន ឬធ្វើពីអ្វីឲ្យពិតប្រាកដនោះទេ ហើយក៏មិនដឹងថា មានតម្លៃថ្លៃប៉ុណ្ណានោះដែរ ដោយរង់ចាំមន្ទីរជំនាញដើម្បីធ្វើការពិនិត្យ និងវាយតម្លៃឲ្យពិតប្រាកដ»៕