សេចក្តីប្រកាសព័ត៌មានមួយ ដែលចេញផ្សាយដោយ Antitrust Authority របស់អ៊ីតាលី បានបញ្ជាក់ថា ក្រុមហ៊ុន Google អាចនឹងត្រូវពិន័យចំនួន ១០០ លានផោន ដោយផ្អែកលើហេតុផលដែលថា Google បានបដិសេធកម្មវិធីរបស់ JuicePass របស់ក្រុមហ៊ុន Enel X របស់អ៊ីតាលី ដែលជាកម្មវិធីមួយជួយអ្នកបើកបររកឃើញស្ថានីយសាកថ្មរថយន្តអគ្គិសនី។
ការស៊ើបអង្កេតរបស់អាជ្ញាធរបានរកឃើញថា Google បានដកកម្មវិធី JuicePass ចេញពីប្រព័ន្ធប្រតិបត្តិការ Android Auto អស់រយៈពេលជាងពីរឆ្នាំមកហើយ។ “ យោងតាមការរកឃើញរបស់អាជ្ញាធរបានអោយដឹងថា Google មិនបានអនុញ្ញាតិឱ្យ Enel X Italia បង្កើតនូវកម្មវិធី JuicePass ដែលអាចប្រើបានជាមួយ Android Auto នោះទេ”។
អ្នកនាំពាក្យរបស់ក្រុមហ៊ុន Google នៅអ៊ីតាលីបានប្រាប់សារព័ត៌មាន រ៉យទ័រ ថា ក្រុមហ៊ុន Google “ មិនយល់ស្រប” ចំពោះសេចក្តីសម្រេចរបស់អាជ្ញាធរនេះ។ អ្នកនាំពាក្យបញ្ជាក់ថា Google ផ្តល់អាទិភាពដល់សុវត្ថិភាពនៅលើ Android Auto ហើយវាមានគោលការណ៍ណែនាំតឹងរឹងលើកម្មវិធីណាដែលវាគាំទ្រ។
យ៉ាងណាក៏ដោយ Enel X សង្ឃឹមថា Google នឹងដាក់បញ្ចូលកម្មវិធី JuicePass របស់ខ្លួនដែលអភិវឌ្ឍន៍សម្រាប់កម្មវិធីបញ្ចូលថ្ម ទៅក្នុង Google App ជាថ្មីម្តងទៀត៕