បើតាមការប្រកាសរបស់ក្រសួងអប់រំបានបង្ហាញថា បន្ទាប់ពីដាក់ឲ្យដំណើរការអស់រយៈពេលមួយសប្តាហ៍ «កម្មវិធីស្វ័យសិក្សា MoEYS E-Learning» ត្រូវបានទាញយក និងចុះឈ្មោះចំនួនប្រមាណ ១៤ម៉ឺនគណនី នៃអ្នកប្រើប្រាស់ ទូទាំង២៥ រាជធានី ខេត្ត។
សូមបញ្ជាក់ថា កម្មវិធីស្វ័យសិក្សាថ្មី MoEYS E-Learning ត្រូវបានបង្កើតឡើង ដើម្បីផ្តល់ជាជំនួយដល់សិស្សានុសិស្សទាំងអស់ក្នុងការសិក្សាដោយខ្លួនឯងតាមប្រព័ន្ធឌីជីថល ដែលជាការឆ្លើយតបទៅនឹងផលប៉ះពាល់ ដែលបណ្ដាលមកពីការរាតត្បាតនៃជំងឺរាតត្បាតកូវីដ-១៩។
នៅក្នុងកម្មវិធីនេះ សិស្សានុសិស្សអាចទទួលបានព័ត៌មានសំខាន់ៗ វីដេអូមេរៀនពីថ្នាក់ទី១ ដល់ថ្នាក់ទី១២ កម្រងសៀវភៅសិក្សាចាំបាច់ សម្រាប់កម្មវិធីសិក្សាចំណេះទូទៅ និងលំហាត់សាកល្បងសមត្ថភាព រួមជាមួយមុខងារល្អៗជាច្រើនទៀត៕