(ភ្នំពេញ) – លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានបង្ហាញពីក្តីសង្ឃឹមថា ស្ថានភាពជំងឺកូវីដ១៩នៅក្នុងប្រទេសកម្ពុជាអាចនឹងវិលត្រឡប់មកភាពល្អប្រសើរវិញ ក្រោយពីមើលឃើញថា ចំនួនឆ្លងថ្មីនាពេលប៉ុន្មានថ្ងៃមកនេះ មានការធ្លាក់ចុះច្រើន ហើយចំនួនអ្នកជាសះស្បើយវិញ ក៏មានកំណើនគួរឲ្យកត់សម្គាល់។
យ៉ាងណាក៏ដោយ មន្ត្រីជាន់ខ្ពស់ក្រសួងសុខាភិបាលរូបនេះ ក៏នៅមិនទាន់ហ៊ានវាយតម្លៃចំពោះស្ថានភាពកូវីដ១៩នៅកម្ពុជានាពេលនេះដែរ ប៉ុន្តែលោកស្រីថា ជោគជ័យលើព្រឹត្តិការសហគមន៍២០ កុម្ភៈនេះ ឬមិនជោគជ័យ គឺអាស្រ័យលើប្រជាពលរដ្ឋ និងសហគមន៍ទាំងអស់ ចូលរួមតាមរយៈការបន្តអនុវត្តតាមវិធានការសុខាភិបាល ៣កុំ ៣ការពារ ជាដើម ជាមួយនឹងការចូលរួមចាក់វ៉ាក់សាំងឲ្យបានគ្រប់២ដូស។
ជាការកត់សម្គាល់ នាប៉ុន្មានថ្ងៃមកនេះ ចំនួនឆ្លងកូវីដ១៩ប្រចាំថ្ងៃមានការធ្លាក់ចុះជាបន្តបន្ទាប់ ចាប់ពីចំនួនខ្ពស់បំផុតជាង៩រយនាក់ មកនៅត្រឹមប្រមាណ៣រយនាក់ប៉ុណ្ណោះ ខណៈដែលអ្នកជាសះស្បើយក៏កើនឡើង ដោយមានរហូតទៅដល់ជាង១ពាក់នាក់៕
