លោក ជៀប សួរ អគ្គនាយកនៃអគ្គនាយកដ្ឋានប្រេងកាត បានថ្លែងឲ្យដឹងថា ក្នុងខែឧសភា នេះ ក្រុមហ៊ុន KrisEnergy ដែលជាក្រុមហ៊ុនរុករក និងបូមប្រេងរបស់ប្រទេសសិង្ហបុរី នៅកម្ពុជា នឹងនាំចេញប្រេងរបស់កម្ពុជា ទៅលក់នៅលើទីផ្សារអន្តរជាតិ ក្នុងបរិមាណពី ២៧ម៉ឺន ទៅ ៣០ម៉ឺនបារ៉ែល។
បើតាមអគ្គនាយកប្រេងកាតរូបនេះថា បច្ចុប្បន្នក្រសួងកំពុងពិនិត្យជាមួយក្រុមហ៊ុនអំពីការស្នើរសុំទិញប្រេងលើកទី១ ពីកម្ពុជា ក្នុងនោះនៅពេលក្រសួងសម្រេចលើសំណើរណាមួយ នោះនឹងអាចដឹងថា ប្រេងនេះនាំចេញទៅទីណា និងការនាំយកទៅស្តុកទុកដាក់កន្លែងណាមួយ។ តែសម្រាប់ជំហាននៃការនាំចេញប្រេងបន្ទាប់ ក្រសួងមិនទាន់ធ្វើការកំណត់ទៅតាមទិសដៅនាំចេញបាននៅឡើយ ដោយអាស្រ័យលើការផលិតជាក់ស្តែង នឹងការស្វែងរកទីផ្សារថ្មីៗបន្ថែមទៀត ។
គួរបញ្ជាក់ថា កម្ពុជាបានទទួលដំណក់ប្រេងលើកដំបូងកាលពីថ្ងៃទី២៩ ខែធ្នូ ឆ្នាំ២០២០ ក្រោយពីរាជរដ្ឋាភិបាលបានចុះហត្ថលេខាលើកិច្ចព្រមព្រៀងជាមួយក្រុមហ៊ុន KrisEnergy កាលពីឆ្នាំ២០១៧ ក្នុងការរុករកប្រេងក្នុងដែនសមុទ្ររបស់កម្ពុជា។ ក្នុងកិច្ចព្រមព្រៀងនោះ ក្រុមហ៊ុនគ្រោងអភិវឌ្ឍការបូមប្រេងឆៅ ជា ៣ដំណាក់កាល ដោយដំណាក់កាលទី១ផ្តើមនៅតំបន់អប្សារា ដែលមានអណ្តូងសរុប ៨៥ ក៏ប៉ុន្តែក្រុមហ៊ុនបានយកដំណក់ប្រេងដំបូងទៅលើអណ្តូងចំនួន៥ ជាការចាប់ផ្តើមដំបូងសិន៕
