ថ្លែងប្រាប់កាសែតកម្ពុជាថ្មីនៅរសៀលថ្ងៃទី២៥ ខែឧសភានេះ លោក ជួន ណារិន្ទ ស្នងការនគរបាលខេត្តព្រះសីហនុ បានបញ្ជាក់ថា ករណីលួចបង្កប់កាមេរ៉ានៅក្នុងបន្ទប់សណ្ឋាគារសមុទ្រមាស គឺជាសំណុំរឿងចាស់កាលពីខែតុលា ឆ្នាំ២០២០ ហើយករណីនេះ តុលាការបានសម្រេចក្តីរួចហើយ ហើយជនដែលពាក់ព័ន្ធនឹងការបង្កប់កាមេរ៉ានោះ ក៏កំពុងតែអនុវត្តទោសក្នុងពន្ធនាគារនៅឡើយដែរ។
គួរបញ្ជាក់ថា នៅថ្ងៃនេះ តាមរយៈទំព័រ facebook កញ្ញា ដេននី ក្វាន់ ដែលគេដឹងថា គឺជាតារាស្រីស៊ិចស៊ី បានបង្ហោះសាររួមទាំងវីដេអូ ដោយសម្តែងនូវការកើតទុក្ខមិនសុខចិត្តចំពោះករណីសណ្ឋាគារសមុទ្រមាសនៅក្រុងព្រះសីហនុ ដែលបានលួចបង្កប់កាមេរ៉ានៅក្នុងបន្ទប់ស្នាក់នៅរបស់នាង ហើយពេលនេះបានផ្តល់សំណងមកនាងត្រឹមតែ ១ម៉ឺនដុល្លារប៉ុណ្ណោះ។
នាងថា ករណីនេះបានកើតឡើងតាំងតែពីខែតុលា ឆ្នាំ២០២០ ហើយការដែលនាងទើបទម្លាយចេញនៅពេលនេះ ក៏ព្រោះតែនាងរង់ចាំដំណោះស្រាយល្អជាមួយម្ចាស់សណ្ឋាគារ តែឥឡូវលទ្ធផលចេញមក គឺអយុត្តិធម៌សម្រាប់នាងណាស់ ដោយការឲ្យសំណង ១ម៉ឺនដុល្លារនេះ ប្រៀបដូចជាមើលងាយកិត្តិយសរបស់នាងដែលជាស្រ្តីខ្មែរពេកហើយ៕
