កម្ពុជាមានគម្រោងនឹងបើកឲ្យមានការចូលមកទស្សនាប្រទេសកម្ពុជាឡើងវិញជាបណ្តើរៗនៅក្នុងត្រីមាសទី៤ ឆ្នាំ២០២១ ដោយផ្តោតអាទិភាពការអនុវត្តគម្រោងក្នុងជំហានទី១នៅខេត្តសៀមរាប-អង្គរ និងសង្កត់ធ្ងន់លើយុទ្ធសាស្រ្តទាក់ទាញទីផ្សារទេសចរណ៍ដែលមានហានិភ័យកូវីដ-១៩ ទាប ឬដែលមានការគ្រប់គ្រងការកូវីដ-១៩បានល្អ ឬទីផ្សារដែលស្ថិតក្នុងតំបន់ព័ណ៌បៃតង។
ក្នុងកិច្ចប្រជុំចង្អៀតធ្វើឡើងតាមប្រព័ន្ធវីដេអូ (Video Conference) កាលពីថ្ងៃទី២៤ ឧសភា ដឹកនាំដោយលោក ថោង ខុន រដ្ឋមន្រ្តីក្រសួងទេសចរណ៍ គម្រោងសាកល្បងនៃការបើកទេសចរណ៍ជាបណ្តើរៗនេះនឹងផ្តោតលើ៣ចំណុច ក្នុងនោះរួមមាន៖
១). ការកសាងទំនុកចិត្តសម្រាប់ទេសចរ (Build Trust and Confident)
២). ការសម្រួលការធ្វើដំណើរ (Travel Facilitation) ដោយគម្រោងស្នើសុំលើកលែងលក្ខខណ្ឌនៃការធ្វើចត្តាទ្បីស័កទាំងស្រុងចំពោះទេសចរអន្តរជាតិ ដែលបានចាក់វ៉ាក់សាំងហើយ ចេញពីទីផ្សារបៃតង
៣). ការសម្រួលតម្លៃកញ្ចប់ទស្សនកិច្ចសមរម្យ ដើម្បីធានាការប្រកួតប្រជែងក្នុងតំបន់។
យ៉ាងណាក៏ដោយ គម្រោងមួយនេះ ក្រសួងទេសចរណ៍កំពុងធ្វើការពិគ្រោះយោបល់បន្ថែមទៀតជាមួយវិស័យឯកជន មុនស្នើសុំសេចក្តីសំរេចពី រាជរដ្ឋាភិបាល៕