យោងតាមសេចក្តីរាយការណ៍បានឲ្យដឹងថា ពេលនេះមានបុគ្គលម្នាក់ដែលជាមនុស្សជំនិតរបស់លោក សេង ម៉ៅ មេឃុំកំពង់រាប កំពុងតែសង់សំណង់រឹងមាំនៅលើប្រឡាយទឹករបស់រដ្ឋ ស្ថិតនៅភូមិជំនីកខាងជើង ដែលសូម្បីតែមេភូមិដែលជាអាជ្ញាធរមូលដ្ឋានផ្ទាល់ ក៏មិនហ៊ានហាមឃាត់ដែរ។
បុគ្គលដែលជាម្ចាស់សំណង់នោះបាននិយាយថា ការសាងសង់របស់គេនេះ គឺបានការអនុញ្ញាតត្រឹមត្រូវពីលោក សេង ម៉ៅ ដែលជាមេឃុំកំពង់រាប ដូច្នេះហើយទើបគេហ៊ានសាងសង់។
បើតាមប្រជាពលរដ្ឋរស់នៅក្នុងមូលដ្ឋានបានឲ្យដឹងថា បច្ចុប្បន្ននេះ លោក សេង ម៉ៅ មេឃុំកំពង់រាប ហាក់បីដូចជាជិះសេះលែងដៃអញ្ចឹង ដោយពេលនេះគាត់បានច្បាមយកដីរដ្ឋជាច្រើនកន្លែង ហើយថែមទាំងឲ្យបក្ខពួករបស់ខ្លួនសាងសង់សំណង់ផ្សេងៗស្រេចតែអំពើចិត្តនៅតាមចំណីព្រែក ចំណីស្ទឹងជាដើម។
ពាក់ព័ន្ធនឹងករណីអនុញ្ញាតឲ្យបក្ខពួករបស់ខ្លួនសង់សំណង់រឹងមាំនៅលើប្រឡាយទឹករបស់រដ្ឋនេះ យើងមិនអាចទាក់ទងសុំការបំភ្លឺពីលោក សេង ម៉ៅ បានទេនៅថ្ងៃនេះ, តែបើតាមលោក ស សារ៉ាន់ ស្មៀនឃុំកំពង់រាបវិញបានថ្លែងថា លោកបានដឹងពីរឿងនេះដែរ ដោយថា ម្ចាស់សំណង់នោះបានដាក់ពាក្យស្នើសុំតាមរយៈភូមិ និងឡើងមកឃុំ ដោយការសាងសង់នោះ គឺជាការសាងសង់ស្នាក់នៅបណ្តោះអាសន្ន ហើយលោកមេឃុំក៏បានអនុញ្ញាតទៅ។
បើតាមប្រភពខ្លះបានឲ្យដឹងថា ពេលនេះមានប្រជាពលរដ្ឋជាច្រើនគ្រួសារ គ្រោងនឹងរៀបចំពាក្យស្នើសុំទៅកាន់លោកមេឃុំកំពង់រាបហើយ ដើម្បីសង់ផ្ទះស្នាក់នៅបណ្តោះអាសន្ននៅលើប្រឡាយព្រែក ដូចករណីខាងលើដែរ។
យ៉ាងណាក៏ដោយ ចំពោះករណីនេះ លោក ញ៉ែម ស្រស់ អភិបាលស្រុកព្រៃកប្បាស បានថ្លែងថា ករណីសំណង់លើប្រឡាយទឹករបស់រដ្ឋនោះ លោកបានឲ្យសមត្ថកិច្ចចុះទៅហាមឃាត់ម្តងជាពីរដងហើយ ហើយថា រឿងសំណង់នោះជាសំណង់បណ្តោះអាសន្ន លោកមិនឯកភាពទេ ព្រោះសំណង់បណ្តោះអាសន្ន គឺជាកូនខ្ទម ឬសំណង់ងាយរុះរើ តែការសាងសង់នៅលើប្រឡាយនោះ គឺជាការចាក់សរសរសំណង់រឹងមាំ ដូច្នេះលោកនឹងកោះហៅលោកមេឃុំមកបំភ្លឺក្នុងពេលឆាប់ៗនេះហើយ៕