(កោះកុង) – កាលពីវេលាម៉ោងប្រមាណជិត១១យប់ថ្ងៃទី២ ខែមិថុនា ឆ្នាំ២០២១ នៅលើផ្លូវគ្រួសក្រហម ស្ថិតក្នុងភូមិប្រលាន ឃុំកណ្តោល ស្រុកបូទុមសាគរ មានករណីគ្រោះថ្នាក់ចរាចរណ៍បង្ករឡើងដោយ ម៉ូតូបុកនិងម៉ូតូ (ជិះបញ្រ្ចាសទិសគ្នា) បណ្តាលឲ្យមនុស្សស្លាប់១នាក់ និងរងរបួសធ្ងន់១នាក់។
ប្រភពពីកន្លែងកើតហេតុបង្ហាញថា ជនបង្ករជិះម៉ូតូម៉ាក វេវពណ៌ខៀវ គ្មានស្លាកលេខ បើកបរ ទិសដៅពីរកើតទៅលិចដោយមិនប្រកាន់ស្តាំ និងស្ថិតក្នុងស្ថានភាពស្រវឹងផង លុះមកដល់ចំណុចកើតហេតុ ក៏បានបុកម៉ូតូ ០១គ្រឿងទៀតម៉ាកវ៉េវពណ៌ក្រហមលាយខ្មៅគ្មានស្លាលេខ។
សមត្ថកិច្ចថា ជនបង្ករឈ្មោះ សៀង សឿន ភេទប្រុស អាយុ ៤២ឆ្នាំ ជនជាតិខ្មែរ មានទីលំនៅភូមិប្រលាន ឃុំកណ្តោល ស្រុកបូទុមសាគរ (ស្លាប់) រីឯ ជនរងគ្រោះឈ្មោះ សេក រិន ភេទប្រុស អាយុ ៣៩ឆ្នាំ ជនជាតិខ្មែរ មានទីលំនៅភូមិប្រលាន ឃុំកណ្តោល ស្រុកបូទុមសាគរ(របួសធ្ងន់) ។
ក្រោយកើតហេតុជនរងគ្រោះ និងជនបង្ករ ត្រូវបានបញ្ជូនទៅមណ្ឌលសុខភាពអណ្តូងទឹក ស្រុកបូទុមសាគរ ពេលបញ្ជូនដល់មណ្ឌលសុខភាពអណ្តូងទឹក ជនបង្ករបានស្លាប់នៅមណ្ឌល រីឯជនរងគ្រោះម្នាក់ទៀត បានបញ្ជូនបន្តទៅមន្ទីរពេទ្យបង្អែក ស្រុកស្រែអំបិល ចំណែកម៉ូតូទាំងពីរគ្រឿងសមត្ថកិច្ច យកមករក្សាទុកនៅអធិការដ្ឋាន ដើម្បីចាត់ការបន្ត៕