ដំណក់ប្រេងដំបូងរបស់កម្ពុជា ត្រូវបានគេយកទៅតម្កល់ទុកនៅក្នុងវិមានឈ្នះ-ឈ្នះហើយ នាព្រឹកថ្ងៃទី៩ ខែមិថុនា ឆ្នាំ២០២១នេះ ដោយមានលោក ស៊ុយ សែម រដ្ឋមន្រ្តីក្រសួងរ៉ែ និងថាមពល ប្រគល់ជូនដោយផ្ទាល់ទៅកាន់ សម្តេចពិជ័យសេនា ទៀ បាញ់ រដ្ឋមន្រ្តីក្រសួងការពារជាតិ។
ក្នុងឱកាសនោះ សម្តេចពិជ័យសេនា ទៀ បាញ់ បានលើកឡើងថា ដំណក់ប្រេងលើកដំបូងរបស់កម្ពុជា ត្រូវបានបូមនៅថ្ងៃទី២៩ ខែធ្នូ ឆ្នាំ២០២០ ដែលជាខួប២២ឆ្នាំ នៃការបិទបញ្ចប់សង្គ្រាមនៅកម្ពុជា ក្រោមនយោបាយឈ្នះ-ឈ្នះ របស់សម្តេចតេជោ ហ៊ុន សែន នាយករដ្ឋមន្រ្តី ហើយថា ដំណក់ប្រេងនេះ គឺជាមរតក និងជាសមិទ្ធផលមួយកើតចេញពីម្លប់សុខសន្តិភាព ដែលរកបានមកដោយលំបាកជាទីបំផុត៕
