គ្រាប់មីន និងគ្រាប់កាំភ្លើងជាច្រើនគ្រាប់ ត្រូវបានពលរដ្ឋម្នាក់ប្រទះឃើញនៅមាត់ស្ទឹងក្នុងភូមិសាស្រ្តភូមិផ្លូវមាស ឃុំផ្លូវមាស ស្រុករតនមណ្ឌល ខេត្តបាត់ដំបង កាលពីថ្ងៃទី៨ មិថុនា ម្សិលមិញ ខណៈគាត់កំពុងតែរកត្រី។
បើតាមលោកវរសេនីយ៍ឯក សន និល អធិការនគរបាលស្រុករតនមណ្ឌលថា ទីតាំងដែលប្រជាពលរដ្ឋប្រទះឃើញគ្រាប់នោះ កាលពីមុនគឺជាសមរភូមិប្រយុទ្ធក្តៅ ដូចនេះហើយគឺអាចនៅសេសសល់គ្រាប់ ឬគ្រាប់មីនជាច្រើនដែលកងទ័ពកប់ទុកនៅក្នុងដី។
តាមលោកអធិការថា គ្រាប់ទាំងនេះ បានលេចចេញមក ដោយសារតែមានភ្លៀងធ្លាក់ខ្លាំង ធ្វើឲ្យទឹកហូរច្រោះដាច់ដីបន្តិចម្តងៗរហូតដល់វាផុសចេញមកលើដីនៅក្នុងគុម្ពឬស្សី ទើបប្រជាពលរដ្ឋប្រទះឃើញតែម្តង។
គ្រាប់ទាំងនោះ ត្រូវសមត្ថកិច្ចបញ្ជាក់ថា មានគ្រាប់មីនប្រភេទ 72A ចំនួន ៣៦គ្រាប់ គ្រាប់កាំភ្លើងប្រភេទ B40ចំនួន ០៣គ្រាប់ និងគ្រាប់កាំភ្លើងប្រភេទ K57ចំនួន ៥០០គ្រាប់៕
