(កោះកុង) – មន្រ្តីសុខាភិបាលខេត្តកោះកុងបានឲ្យដឹងថា កាលពីថ្ងៃទី១០ មិថុនា ម្សិលមិញនេះ មានបុរសវ័យ ៦៤ឆ្នាំម្នាក់បានស្លាប់ដោយសារជំងឺកូវីដ-១៩ ហើយភ្លាមនោះ គេបានធ្វើតេស្តរកសាច់ញាតិអ្នកស្លាប់មានផ្ទុកវីរុសកូវីដ-១៩ ចំនួន ២នាក់ក្នុងចំណោម ៦នាក់។
លោកវេជ្ជបណ្ឌិត ហៃ ឡៃសុន ប្រធានមន្ទីរពេទ្យបង្អែកខេត្តកោះកុង បានថ្លែងថា បុរសដែលស្លាប់នោះ មានឈ្មោះ ចាន់ លី បានស្លាប់នៅលើរថយន្តមុនពេលមកដល់មន្ទីរពេទ្យ។ តាមលោកប្រធានមន្ទីរពេទ្យថា បុរសរូបនោះបានធ្វើដំណើរមកពីទីក្រុងភ្នំពេញរយៈពេល៤ថ្ងៃមកហើយ ដោយគាត់មកសម្រាកជាមួយកូនដែលជាអ្នកចាំចម្ការ នៅចំណុចវង់កថៈ ស្ថិតក្នុងភូមិចាំយាម ឃុំប៉ាក់ខ្លង ស្រុកមណ្ឌលសីមា, ហើយអំឡុងពេល៤ថ្ងៃនេះ បុរសដែលស្លាប់មានអាការៈដកដង្ហើមដង្ហក់ខ្លាំង ទើបក្រុមគ្រួសារដឹកមកពិនិត្យព្យាបាលនៅមន្ទីរពេទ្យ ប៉ុន្តែដោយសារមើលនូវស្ថានភាពរបស់អ្នកជំងឺធ្ងន់ធ្ងរខ្លាំង ក្រុមគ្រូពេទ្យក៏ផ្តើមស្រាវជ្រាវជាបន្ទាន់មួយដោយមិនអនុញ្ញាតឲ្យយកអ្នកជំងឺចេញពីរថយន្តភ្លាមៗទេ ។
លោកវេជ្ជបណ្ឌិត ហៃ ឡៃសុន អះអាងថា ជៀសវាងមាន ហានិភ័យនៃការឆ្លងរីករាលដាលជំងឺ ករណីសង្ស័យលើអ្នកពាក់ព័ន្ធនេះ ខាងក្រុមគ្រូពេទ្យពុំអនុញ្ញាតឲ្យក្រុមគ្រួសារយកសាកសពចេញពីមន្ទីរពេទ្យឡើយ ដើម្បីផ្តល់លទ្ធភាពដល់ក្រុមគ្រូពេទ្យរៀបចំវេចខ្ចប់តាមលក្ខណៈបច្ចេកទេសវេជ្ជសាស្ត្រ។
តាមការបញ្ជាក់បន្ថែមពីលោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុង ប្រាប់ថា មន្ត្រីសុខាភិបាល កំពុងតាមដានរកអ្នកដែលជាប់ពាក់ព័ន្ធជាមួយអ្នកស្លាប់ជាច្រើននាក់ នៅតំបន់វង់កាថៈ ឃុំប៉ាក់ខ្លង ជាពិសេស ក្នុងតំបន់សេដ្ឋកិច្ចពិសេសខេត្តកោះកុង គ្រាដែលកូនប្រសារបុរសវ័យចំណាស់ដែលស្លាប់បម្រើការងារនៅការិយាល័យរដ្ឋបាលក្នុងរោងចក្រ KKN ។
លោកវេជ្ជបណ្ឌិត ទៅ ម៉ឹង អះអាងទៀតថា សពបុរសឈ្មោះ ចាន់ លី យកទៅបូជានៅវត្តព្រែកស្វាយ សង្កាត់ស្ទឹងវែង ក្រុងខេមរភូមិន្ទ៕
