លោក ប៉ែន រដ្ឋា ដែលមានតួនាទីជាអធិការរងនគបាលស្រុកអង្គរបុរី ត្រូវគេរាយការណ៍មកថា បានយកតួនាទីទៅរំដោះមនុស្សម្នាក់ដែលកំពុងយកសំណាកក្នុងមណ្ឌលចត្តាឡីសក័ឲ្យទៅផ្ទះវិញ ខណៈប្រជាពលរដ្ឋដ៍ទៃទៀត ត្រូវបានជាប់ក្នុងមណ្ឌលចត្តាឡីស័កដែលតម្រូវរហូតដល់១៤ថ្ងៃនោះ។
ប្រជាពលរដ្ឋបានលើកឡើងថា លោក ប៉ែន រដ្ឋា នេះ ចាប់តាំងពីបានឡើងជាអធិការរងស្រុកអង្គរបូរីមក គឺតែងតែប្រើអំណាចអន្តរាគមន៍ និងសាងរឿងអាស្រូវជាច្រើន ដូច្នេះពួកគាត់រំពឹងថា លោកស្នងការនគរបាលខេត្តតាកែវនឹងចាត់វិធានការស៊ើបអង្កេតចំពោះអធិការរងនគរបាលស្រុកអង្គរបូរីរូបនេះ។
ពាក់ព័ន្ធនឹងករណីរំដោះមនុស្សចេញពីកន្លែងធ្វើចត្តាឡីស័កនេះ យើងមិនអាចស្វែងរកការបំភ្លឺពីលោក ប៉ែន រដ្ឋាអធិការរងនគរបាលស្រុកអង្គរបូរីបានទេនៅថ្ងៃនេះ, ចំណែកលោក យ៉ុង ប៊ុនយុន អធិការនគរបាលស្រុកអង្គរបូរីបានថ្លែងថា លោកអត់បានដឹងរឿងនេះទេ។
លោក ឌឹម គឹមសាន្ត អភិបាលស្រុកអង្គរបូរីបានថ្លែងថា លោកដឹងរឿងនេះខ្លះៗដែរ តាមរយៈលោក រស់ រត្ន័អភិបាលរងស្រុករាយការណ៍ជូនលោក ដោយថា អធិការរងរូបនោះបានសុំយកមនុស្សចេញពីមណ្ឌលតែលោកមិនបានអនុញ្ញាតិឲ្យយកចេញទេ តែលោកអធិការរងរូបនោះបានយកចេញទៅផុតហើយ។
លោកថា លោកបានបញ្ជាទៅលោក រស់ រត្ន័ ឲ្យលោកអធិការរងរូបនោះយកមនុស្សដែលរំដោះចេញមកចូលក្នុងមណ្ឌលចត្តាឡីសក័វិញជាបន្ទាន់ តែរឿងយកមនុស្សមកវិញ ឬមិនយកមកវិញនោះ លោកក៏មិនបានតាមដានទៀតដែរគឺលោក រស់ រត្ន័ ជាអ្នកចាត់ចែង។
យោងតាមមាត្រា ២៣ នៃអនុក្រឹត្យ ស្តីពីការទប់ស្កាត់ការឆ្លងរាលដាលជំងឺកូវីដ១៩ «អ្នកផ្តើមគំនិត ដឹកនាំ ណែនាំ បញ្ចុះបញ្ចូល ឬជួយសម្រួលដោយចេតនា ដល់បុគ្គលដែលត្រូវធ្វើចត្តាឡីស័កឲ្យគេចចេញពីការត្រួតពិនិត្យរបស់មន្រ្តីចត្តាឡីស័ក ឬគេចវេសពីការធ្វើចត្តាឡីស័ក ឬគេចចេញពីទីកន្លែងធ្វើចត្តាឡីស័ក ត្រូវផ្តន្ទាទោសជាពិន័យអន្តរការណ៍ពី ១០លានរៀល ទៅ ៥០លានរៀល» ហើយប្រសិនបើការគេចវេសនោះ បណ្តាលឲ្យមានការចម្លងជំងឺកូវីដ១៩ដល់អ្នដទៃទៀតនោះ គឺអាចនឹងជាប់ពន្ធនាគារទៀតផង៕