បើតាមការលើកឡើងរបស់លោក សៅ កុសល នាយខណ្ឌរដ្ឋបាលជលផលខេត្តតាកែវបានបញ្ជាក់ថា សំណុំរឿងប្រធានសហគមន៍នេសាទកំពង់រាប និងបក្ខពួក នាំគ្នាយកអួនចូលទៅអូសយកត្រីក្នុងអន្លង់អភិរក្សដែលខ្លួនមើលការពារនោះ ពេលនេះបានចូលមកដល់ដៃខណ្ឌរដ្ឋបាលជលផលខេត្តហើយ ហើយឆាប់ៗនេះ សំណុំរឿងនឹងបញ្ជូនទៅកាន់តុលាការហើយ។
មេសហគមន៍នេសាទកំពង់រាប និងសកម្មភាពព័ទ្ធចាប់ត្រីក្នុងអន្លង់អភិរក្ស
តាមលោក សៅ កុសល ពេលនេះជលផលកំពុងប្រមូលភស្តុតាង និងសាក្សី ព្រមទាំងពិនិត្យអង្គហេតុនៃរឿងនេះសិន មុននឹងត្រៀមបញ្ជូនទៅតុលាការ ដោយយ៉ាងយូរ ប្រមាណ ២សប្តាហ៍ទៀតប៉ុណ្ណោះ នឹងទៅដល់ដៃតុលាការហើយ។
សូមបញ្ជាក់ថា កាលពីពេលថ្មីៗនេះ នៅចំណុចបឹងអភិរក្សត្រីពូជអន្លង់ចិន ស្ថិតក្នុងឃុំកំពង់រាប ស្រុកព្រៃកប្បាស ប្រជាពលរដ្ឋរាប់សិបនាក់បានលើកគ្នាធ្វើការតវ៉ា ក្រោយពីបានឃើញក្រុមឆ្មាំអភិរក្សមានគ្នាប្រមាណជា ១០នាក់ បាននាំគ្នាយកអួនទៅព័ទ្ធចាប់ត្រី នៅក្នុងអន្លង់អភិរក្សនោះ។
ការតវ៉ានៅពេលនោះ ក៏មានការប្តឹងទៅដល់អាជ្ញាធរស្រុក ហើយភ្លាមៗកម្លាំងចម្រុះដឹកនាំដោយលោក លោក កង វន្ថា អភិបាលរងស្រុកព្រៃកប្បាស ក៏បានមកដល់ ដោយបានដកហូតយកសម្ភារៈល្មើស និងរកឃើញអ្នកប្រព្រឹត្តសរុបចំនួន១១នាក់ ក្នុងនោះមានទាំងអនុប្រធាន និងប្រធានសហគមន៍នេសាទកំពង់រាប ផងដែរ។
សកម្មភាពពលរដ្ឋលើកគ្នាតវ៉ា
ក្នុងកំណត់ហេតុសាកសួរ លោក រស់ ប៉ុន អនុប្រធានសហគមន៍នេសាទកំពង់រាបបានថ្លែងថា លោកធ្វើតាមតែការបញ្ជាពីលោក អុិន ជឿន ជាប្រធានសហគមន៍ប៉ុណ្ណោះ ដោយថា លោក អុិន ជឿន ជាអ្នកបញ្ជាឲ្យលោកទៅជួលស្បៃអ៊ួនដើម្បីយកទៅហ៊ំពន្ធ័ចាប់ត្រីក្នុងអន្លង់ តែម្ចាស់អ៊ួនគេមិនព្រមជួលឲ្យទេ ទាល់តែប្រធានសហគមន៍ទៅជួលទើបគេព្រមជួលឲ្យ ព្រោះគេខ្លាចខុសច្បាប់ ហើយក្រោយមកលោក អុិន ជឿន ក៏ទៅជួលអ៊ួនដោយខ្លួនឯង និងបានឲ្យយកទៅក្រុមឆ្មាំប្រព្រឹត្តរាយព័ទ្ធចាប់ត្រីតែម្តង។
បើតាមលោក សៅ កុសល នាយខណ្ឌរដ្ឋបាលជលផលខេត្តតាកែវ ថា បទល្មើសនេះ ជនសង្ស័យអាចប្រឈមផ្លូវច្បាប់ជាប់ពន្ធនាគាពី៣ឆ្នាំ ទៅ៥ឆ្នាំ ដោយយោងតាមមាត្រា៩៨ នៃស្ដីពីច្បាប់រដ្ឋបាលជលផល៕
