(សៀមរាប) – សេចក្តីរាយការណ៍ពីប្រជាពលរដ្ឋបានឲ្យដឹងថា ខណៈដែលអាជ្ញាធរ ក៏ដូចជារាជរដ្ឋាភិបាលកំពុងមមាញឹកក្នុងការប្រយុទ្ធប្រឆាំងនឹងជំងឺកូវីដ១៩ គេឃើញឈ្មួញខិលខូចមួយចំនួន បានប្រើប្រាស់គ្រឿងចក្រចូលទៅលួចឈូសឆាយ ទន្ទានដីព្រៃលិចទឹក នៅចំណុចត្រពាំងឆ្តោ ស្ថិតនៅខាងក្រោមទំនប់ ៧៨ ក្នុងឃុំសំរោងយា ស្រុកពួក ខេត្តសៀមរាប។
បើតាមពលរដ្ឋថា មកទល់ពេលនេះ ដីព្រៃលិចទឹកជាជម្រកត្រីពង របស់សហគមន៍កែវពណ៌ ជាប់មាត់បឹងទន្លេសាបនោះ ត្រូវឈ្មួញទន្រ្ទានយកអស់ជាង ១០ហិកតាហើយ ដោយគេនៅមិនទាន់ឃើញអាជ្ញាធរ ឬមន្រ្តីជំនាញចុះអន្តរាគមន៍នៅឡើយទេ។
ចំពោះករណីនេះ លោក ទា គឹមសុទ្ធ ប្រធានមន្ទីរកសិកម្មរុក្ខាប្រមាញ់ និងនេសាទខេត្តសៀមរាប បានមានប្រសាសន៍ថា លោកនឹងឲ្យមន្ត្រីក្រោមឱវាទរបស់លោកចុះទៅពិនិត្យ ព្រមទាំងវែករកមុខសញ្ញាជនដែលបង្កដើម្បីយកមកផ្តន្ទាទោសតាមច្បាប់។
យ៉ាងណាក៏ដោយ បើតាមការលើកឡើងរបស់ប្រជាពលរដ្ឋថា ទីតាំងនោះ ពួកគាត់តែងតែឃើញអ្នកមានលុយប្រើប្រាស់គ្រឿងចក្រមកឈូសឆាយទន្រ្ទានដីព្រៃលិចទឹកនោះជារហូតមកហើយ ហើយពួកគាត់រំពឹងថា អាជ្ញាធរនឹងមានវិធានការឲ្យបានម៉ឺងម៉ាត់ចំពោះការទន្រ្ទានខុសច្បាប់ទាំងនោះ៕
