(កណ្តាល) – កាលពីរសៀលថ្ងៃម្សិលមិញនេះ កម្លាំងប៉ុស្តិ៍នគរបាលរដ្ឋបាលឃុំដីឥដ្ឋ ដោយមានបញ្ជាពីលោក ព្រុំ សំណាង អធិការនគរបាលស្រុកកៀនស្វាយ បានចុះបង្ក្រាបទីតាំងល្បែងស៊ីសងមួយកន្លែងស្ថិតនៅភូមិយួន ឃុំដីឥដ្ឋ ស្រុកកៀនស្វាយ ខេត្តកណ្តាល តែពេលសមត្ថកិច្ចចុះទៅដល់ ស្រាប់តែម្ចាស់ទីតាំងរួមទាំងអ្នកលេងនាំគ្នាគេចខ្លួនបាត់អស់ ដែលគេសង្ស័យថា មានគេលួចប្រាប់មុន។
បើតាមសេចក្តីរាយការណ៍របស់ប្រជាពលរដ្ឋថា ទីតាំងល្បែងស៊ីសងភ្នាល់ដាក់លុយខាងលើនេះបានបើកដំណើរការលេងជាប្រចាំ និងហ៊ោកញ្ជ្រៀវ ដោយគ្មានខ្លាចញញើតសមត្ថកិច្ចនោះឡើយ, តែនៅពេលសមត្ថកិច្ចចុះទៅបង្រ្កាប អ្នកលេងទាំងនោះដូចដឹងខ្លួនមុន គឺបានគេចខ្លួនអស់ ដែលគេសង្ស័យថា ប្រហែលជាមានព្រាយដែលម្ចាស់ទីតាំងធ្លាប់សែនព្រេនឲ្យ ឲ្យដំណឹងហើយមើលទៅ។
យ៉ាងណាក៏ដោយ ចំពោះករណីល្បែងស៊ីសងនេះ សមត្ថកិច្ចបានបញ្ជាក់ថា ខ្លួននឹងធ្វើការស្រាវជ្រាវរកម្ចាស់ទីតាំងយកមកធ្វើកិច្ចសន្យា អប់រំ មិនឲ្យមានការប្រមូលផ្ដុំមនុស្ស និងបញ្ឈប់សកម្មភាពលេងល្បែងស៊ីសងចាប់ពីពេលនេះតទៅ៕