បើតាមសេចក្តីរាយការណ៍មួយបានឲ្យដឹងថា កាលពីពេលថ្មីៗនេះ សមាជិកក្រុមប្រឹក្សាឃុំព្រែកផ្ទោលម្នាក់ គឺលោក អឹម សូលីដា កំពុងរត់ការសុំសិទ្ធកាយយកអាចម៏ដីពីក្រុងត្រពាំងបេតិភ័ណ្ឌបុរាណប្រវត្តិសាស្រ្ត ស្ថិតក្នុងភូមិបាទេព យកទៅលក់ក្រោមលេសស្ដារត្រពាំង។
សេចក្តីរាយការណ៍ថា លោក អឹម សូលីដា បានរត់ការច្បាប់ពីលោកមេភូមិនិងលោកមេឃុំរួចហើយ នៅតែការចុះហត្ថលេខាពីលោក ឌឹម គឹមសាន្ត អភិបាលស្រុកអង្គរបូរី តែប៉ុណ្ណោះ គេនឹងដាក់គ្រឿងចក្រដំណើរការកាយយកអាចម៏ដីក្នុងត្រពាំងប្រវត្តិសាស្រ្តនោះហើយ។
សូមបញ្ជាក់ថា ត្រពាំងបុរាណនោះ មានទំហំប្រមាណ ៣ហិកតា ត្រូវបានគ្រប់គ្រងដោយក្រសួងវប្បធម៌ និងវិចិត្រសិល្បៈ ក្រោយពីគេរកឃើញថា ត្រពាំងនោះ គឺជាត្រពាំងប្រវត្តិសាស្រ្ត។
ជុំវិញករណីនេះ លោក ណុប ឌល មេឃុំព្រែកផ្ទោល បានទទួលស្គាល់ថា លោកពិតជាបានចុះហត្ថលេខាលើឯកសារតាមការស្នើរសុំរបស់លោក អឹម សូលីដា សមាជិកក្រុមប្រឹក្សាឃុំព្រែកផ្ទោលមែន តែរឿងអនុញ្ញាតិតាមកាស្នើរសុំ គឺអាស្រ័យនៅខាងស្រុកដែលមានជំនាញពាក់ពន្ធ័ច្រើន។
លោកមេឃុំបន្តថា រឿងត្រពាំងល្បើក គឺពិតជាត្រពាំងបុរាណប្រវត្តិសាស្រ្តពិតមែន និងជាទ្រព្យសម្បត្តិរបស់រដ្ឋគ្មានកម្មសិទ្ធរបស់អ្នកណាម្នាក់ទេ តែការស្នើរសុំស្ដារគឺដើម្បីបានទឹកស្រោចស្រពដំណាំអ្នកដែលកំពុងអាស្រ័យផលនៅលើដីត្រពាំល្បើកនេះ ហើយលោកមេឃុំបានបញ្ជាក់ទៀតថា ត្រពាំងនេះជាត្រពាំងបុរាណដូច្នេះទំនងជាមានវត្ថុបុរាណ ឬវត្ថុអាថ៌កំបាំងអ្វីខ្លះលោកអត់ដឹងដែរ តែទុកឲ្យខាងថ្នាក់ស្រុកស្រាវជ្រាវតាមហ្នឹងទៅ។
ចំណែកលោក ឌឹម គឹមសាន្ត អភិបាលស្រុកអង្គរបុរីបានឲ្យដឹងថា ចំពោះការស្នើរសុំស្ដារត្រពាំងល្បើកជាត្រពាំងបុរាណប្រវត្តិសាស្រ្តខាងលើ គឺលោកមិនអនុញ្ញាតិឲ្យកាយជាដាច់ខាត ព្រោះវាជាទ្រព្យសម្បត្តិវប្បធម៏របស់ជាតិ៕
