(សៀមរាប) – កាលពីវេលាម៉ោងប្រមាណ១០ព្រឹក ថ្ងៃទី២៣ ខែមិថុនា ឆ្នាំ២០២១នេះ នៅចំណុចផ្លូវខាងក្រោយផ្សារលើធំថ្មី ហៅផ្លូវតាអុច ក្នុងភូមិតាវៀន សង្កាត់សាលាកំរើក ក្រុងសៀមរាប មានករណីគ្រោះថ្នាក់មួយបានកើតឡើង ដោយរថយន្តព្រូសមួយគ្រឿងជិះគ្នា៣នាក់ បានបុកចូលផ្ទះវេលុយ ក្រោយពីអ្នកបើកបរជាន់ហ្គារ ដោយច្រឡំថាជាហ្វាំង។
បើតាមសាក្សីនៅជិតកន្លែងកើតហេតុបានឲ្យដឹងថា មុនពេលកើតហេតុ ឃើញមានរថយន្តព្រូស ពណ៌សមួយគ្រឿងបើកបរពីទិសខាងត្បូង ខណៈមកដល់កន្លែងកើតហេតុ ក៏បានគេចពីម៉ូតូរ៉ឺម៉ក ហើយប្រហែលមិនជាន់ហ្វ្រាំង បែរជាជាន់ហ្គារ ក៏បុកចូលក្នុងផ្ទះវេរលុយ យីហោ អ៊ី ម៉ាននី ខ្ទេចទ្វា កញ្ចក់ និង ទូរទស្សន៍ អស់ចំនួន៣គ្រឿង តែសំណាងល្អនៅក្នុងនោះគ្មានមនុស្ស កុំអីមិនដឹងជាយ៉ាងណានោះទេ។
នគរបាលចរាចរណ៍ផ្លូវគោក នៃស្នងការនគរបាលខេត្តសៀមរាបបានបញ្ជាក់ថា ជនបង្កមានឈ្មោះ ប៊ិន ដូរិទ្ធ ភេទប្រុស អាយុ៣៦ឆ្នាំ ជាបុគ្គលិកអចលនទ្រព្យ ក្នុងក្រុងសៀមរាប មានស្រុកកំណើតនៅភូមិកំពង់ចន្លុះ ឃុំពាង ស្រុកត្បូងឃ្មុំ ខេត្តកំពង់ចាម បើកបររថយន្ត ម៉ាកព្រូស ពណ៌ស ពាក់ស្លាកលេខភ្នំពេញ ២.BC.១៩៨២ ស៊េរី ឆ្នាំ២០១០ មកពីទិសខាងត្បូង បត់មកកើត បំរ៉ុងទៅផ្ទះ ខណៈពេលនោះ មកដល់ចំណុចកើតហេតុ ស្រាប់តែបើកចូលផ្ទះវេរលុយ យីហោ អ៊ី ម៉ានី វីរៈ តែម្តង។
បច្ចុប្បន្ន ជនបង្ក និង ជនរងគ្រោះ បានត្រូវរ៉ូវគ្នាបង់ប្រាក់ចំនួន១០៥០ដុល្លារ ដើម្បីបញ្ចប់រឿង៕
