ព្រៃវែង ៖ ពលរដ្ឋជាច្រើនគ្រួសារ នាថ្ងៃទី២៣ មិថុនា នេះ បានចោទមេឃុំរាប នៃស្រុកពារាំង ខេត្តព្រៃវែង ថា បានឃុបឃិតជាមួយអ្នកមានលុយ ធ្មេចភ្នែកបើកដៃឲ្យមានការរំលោភយកចំណីអូរ ដែលជាទ្រព្យសម្បត្តិសាធារណៈរបស់រដ្ឋ ។
ពលរដ្ឋ ដែលប្រឆាំងចំពោះការទន្រ្ទានយកចំណីអូរ ដែលជាទ្រព្យសម្បត្តិសាធារណៈរបស់់រដ្ឋ
អ្នកភូមិម្នាក់ឈ្មោះ មាស សន ភេទប្រុស អាយុ៧៩ឆ្នាំ បានប្រាប់ក្រុមអ្នករាយការណ៍ព័ត៌មានថាដីចំណីអូរសាធារណៈ ដែលកំពុងមានទំនាស់នោះ ស្ថិតនៅចំណុច (ត្រពាំងខ្វែកចុងរំលេច) ស្ថិតក្នុងភូមិពោធិ៍សាបាង ឃុំរាប ស្រុកពារាំង ខេត្តព្រៃវែង មានទំហំជិតកន្លះហិកតា។ លោកថាបុគ្គលឈ្មោះ ជា បូណា បានមកឈូសឆាយកាន់កាប់រំលោភយកទាំងបំពាន តាំងពីដើមខែមិថុនា នេះ មកម្ល៉េះ បើទោះបីពលរដ្ឋដាក់ពាក្យប្ដឹងក្ដី ក៍អាជ្ញាធរធ្វើមិនដឹងមិនឮដែរ ។
ចំណែកអ្នកស្រី ជា ពិសី ជាកសិករក្នុងភូមិម្នាក់ទៀតក៍បានថ្លែងបញ្ជាក់ដែរថា ឈ្មោះ ជា បូណា បានប្រាប់គាត់ថា ការដែលគេមកបោះបង្គោលថ្ម កំណត់ព្រំដីលើចំណីអូរនេះ មិនមែនធ្វើដោយចិត្តឯងទេ គឺដោយសារតែមានការអនុញ្ញាតពីលោកមេឃុំរាប ផងដែរ ។
យ៉ាងណាក៍ដោយ លោក ផន ផល មេឃុំរាប បានថ្លែងថា លោកមិនបានអនុញ្ញាតឱ្យឈ្មោះ ជា បូណា ទៅដាំបង្គោលថ្ម លើដីរដ្ឋបែបនោះឡើយ ។ លោកថា គេចេះតែនិយាយទេ បើលោកអ្នកអនុញ្ញាតមែន សូមឱ្យឈ្មោះ ជា បូណា បង្ហាញលិខិតមក ។
ទាក់ទងបញ្ហានេះលោក ហ៊ី ធួក អភិបាលស្រុកពារាំង មិនអាចសុំការបកស្រាយបានទេ ព្រោះទូរស័ព្ទចូល គ្មានអ្នកទទួល៕