(សៀមរាប) – កាលពីថ្ងៃទី២៣ ខែមិថុនា ឆ្នាំ២០២១ម្សិលមិញនេះ មានករណីផ្អើលឆោឡោមួយបានកើតឡើង នៅចំណុចភូមិខ្នារ សង្កាត់ជ្រាវ ក្រុងសៀមរាប ក្រោយពីផ្ទះរបស់ស្រ្តីម្នាក់ត្រូវបានគេគាស់កកាយ រួចលួចយកទ្រព្យសម្បត្តិអស់មួយចំនួនធំ។
យោងតាមពាក្យបណ្តឹងរបស់ស្រ្តីឈ្មោះ បឿ ឈុននី អាយុ ៣៦ឆ្នាំ បានបញ្ជាក់ថា កាលពីថ្ងៃទី១៣ ខែមិថុនាឆ្នាំ២០២១ ខ្លួនបានចាក់សោទ្វាផ្ទះទុកចោល ហើយទៅមើលម្តាយឈឺនៅខេត្តត្បូងឃ្មុំ លុះរហូតដល់ថ្ងៃទី២៣ ខែមិថុនា ឆ្នាំ២០២១ ខ្លួនបានត្រឡប់មកផ្ទះវិញ ក៏ឃើញផ្ទះមានស្នាមគាស់ និងរ៉ើកកាយ ក្នុងបន្ទប់ដេក ដោយគាត់បានបាត់បង់ប្រាក់ដុល្លារ ចំនួន 12400 ដុល្លារ ខ្សែកមាស ០១ខ្សែ ទម្ងន់ 01តម្លឹង (ទ្រព្យសម្បត្តិទាំអស់របស់ ជនរងគ្រោះក្នុងស្រោមខ្នើយក្នុងបន្ទប់ដេក) ។
ក្រោយពេលទទួលពាក្យបណ្តឹងហើយ ប៉ុន្មានម៉ោងក្រោយមក សមត្ថកិច្ចបានស្រាវជ្រាវ និងដាក់ការសង្ស័យទៅលើឈ្មោះ យ៉ែម សំណាង (ត្រូវជាប្តីចុងរបស់ជនរងគ្រោះ) ហើយបានធ្វើការឃាត់ខ្លួននៅវេលាម៉ោង៣រសៀលថ្ងៃទី២៣ ខែមិថុនា នោះយកមកសាកសួរ។
ចំពោះមុខសមត្ថកិច្ច ជនសង្ស័យបានឆ្លើយសារភាពថា គាត់ពិតជាបានធ្វើសកម្មភាពគាស់ផ្ទះប្រពន្ធចុង ពិតប្រាកដមែន កាលពីវេលាម៉ោង ១០ព្រឹក ថ្ងៃទី១៩ ខែមិថុនា ក្រោយឃើញប្រពន្ធចុងខ្លួនមិននៅផ្ទះ ដោយខ្លួនបានចូលធ្វើសកម្ម ភាពដោយយកដង្កាប់ កាត់ស័ង្កសីបង្អួច ហើយលូក ដៃបើកគន្លឹះទ្វារចូលបន្ទប់ ហើយធ្វើសកម្មភាព លួចយកប្រាក់ដុល្លាចំនួន 11200$ និង ខ្សែកមាស ១ខ្សែមិនដឹងទម្ងន់ ដើម្បីយកប្រាក់ទៅទិញរថយន្ត តែក្រោយពេលធ្វើសកម្មភាពហើយ ខ្លួនបានយកប្រាក់និងខ្សែកផ្ញើទៅឲ្យប្រពន្ធដើមនៅខេត្តត្បូងឃ្មុំ។
ក្រោយការសាកសួរកម្លាំងបានរៀបចំកសាងសំណុំរឿងបញ្ជូនជនសង្ស័យទៅកាន់តុលាការដើម្បីចាត់ការទៅតាមនីតិវិធី៕
អត្ថបទ៖ តាំង ហូ