(តាកែវ) – បើតាមសេចក្តីរាយការណ៍របស់ប្រជាពលរដ្ឋថា ចាប់តាំងពីព្រលឹមទល់ព្រលប់ ពួកគាត់ឃើញក្រុមឡានដឹកដី ដឹកគ្មានឈប់ឈរ បង្ករជាសម្លេងរំខាន ហើយអាចម៍ដីដែលឡានទាំងនោះដឹក ក៏ធ្លាក់រាយប៉ាយពាសពេញផ្លូវ ហើយបើនៅពេលមានភ្លៀងធ្លាក់មកម្តងៗវិញ គឺរអិលដោយបង្កឲ្យមានគ្រោះថ្នាក់ចរាចរថែមទៀតផង។
ពលរដ្ឋថា ក្រុមឡានដឹកដីទាំងនោះ បើកបរមិនសូវគោរពច្បាប់ចរាចរណ៍ឡើយ ដោយឡានរបស់ពួកគេមិនគ្របតង់ ឬស្រោចទឹកផ្លូវនោះឡើយ ដែលជាហេតុធ្វើប៉ះពាល់ដល់បរិស្ថាន ក៏ដូចជាសុខភាពរបស់ប្រជាពលរដ្ឋ ដូច្នេះប្រជាពលរដ្ឋសំណូមពរដល់ថ្នាក់ដឹកនាំ ជាពិសេសលោកអភិបាលស្រុកព្រៃកប្បាស សូមមេត្តាមានវិធានការចំពោះក្រុមឈ្មួញទាំងនេះផង។
ចំពោះបញ្ហានេះ លោក ញ៉ែម ស្រស់ អភិបាលស្រុកព្រៃកប្បាស បានថ្លែងថា លោកនឹងរៀបចំកម្លាំងចុះទៅមូលដ្ឋានដែលពលរដ្ឋសំណូមពរ ហើយនិងអនុវត្តតាមផ្លូវច្បាប់ចំពោះក្រុមឈ្មួញ បើពិតដូចការលើកឡើងរបស់បងប្អូនប្រជាពលរដ្ឋមែន៕