ក្រសួងសុខាភិបាលកម្ពុជា បានសម្រេចធ្វើការផ្លាស់ប្តូរនីតិវិធីធ្វើចត្តាឡីស័កចំពោះអ្នកដំណើរ ដែលចូលមកប្រទេសកម្ពុជា ដោយតម្រូវឲ្យធ្វើចត្តាឡីស័កនៅតាមបណ្តាខេត្តជាប់ព្រំដែនវិញ ដោយមិនត្រូវបញ្ជូនបន្តមកធ្វើចត្តាឡីស័កនៅភូមិឃុំរបស់ពួកគេទៀតទេ ដើម្បីជាការទប់ស្កាត់ការឆ្លងវីរុសកូវីដ១៩បម្លែងខ្លួនថ្មី (Delta) ចូលមកក្នុងសហគមន៍។
តាមលិខិតរបស់ក្រសួងសុខាភិបាល ផ្ញើជូនដល់អភិបាលរាជធានីខេត្តទាំង២៥ បានផ្តោតទៅលើវិធានការចំនួន៣ គឺ៖
ទី១.អនុវត្តវិធានការចត្តាឡីស័កនៅមណ្ឌលធ្វើចត្តាឡីស័កមាត់ច្រកព្រំដែន ចំពោះអ្នកដំណើរទាំងអស់ដែលធ្វើដំណើរឆ្លងចូលមកប្រទេសកម្ពុជា ដោយមិនធ្វើការដឹកជញ្ជូនបន្ត ដើម្បីយកទៅធ្វើចត្តាឡីស័ក នៅតាមភូមិឃុំទៀតទេ។ ពោលគណៈកម្មការប្រយុទ្ធនឹងជំងឺកូវីដ-១៩ថ្នាក់រាជធានី-ខេត្ត(គ.រ.ខ)ទាំងអស់ត្រូវសហការជាមួយអនុគណៈកម្មការគ្រប់គ្រងច្រកទ្វារចេញ និងចូល និងការធ្វើចត្តាឡីស័ក ដើម្បីកំណត់ទីតាំងមណ្ឌលចត្តាឡីស័កដែលនៅជិតបំផុតសម្រាប់ការធ្វើចត្តាឡីស័កនេះ។ ទន្ទឹមនឹងនេះ អាជ្ញាធរមានសម្ថកិច្ចទាំងអស់ ត្រូវបង្កើនការយកចិត្តទុកដាក់បន្ថែមទៀត ក្នុងការពង្រឹងវិធានការចត្តាឡីស័កនេះ នៅតាមមណ្ឌលឱ្យម៉ឺងម៉ាត់ ស្របតាមគោលការណ៍ណែនាំផ្នែកសុខាភិបាល។
ទី២.បង្កើនការពង្រឹងការគ្រប់គ្រងច្រកព្រំដែន ជាពិសេសច្រករបៀង ចៀងវាងការជ្រៀតឆ្លងព្រំដែនចូលមកប្រទេសកម្ពុជាដោយខុសច្បាប់ ដែលបង្កហានិភ័យក្នុងការចម្លងមេរោគបំប្លែងខ្លួនថ្មីចូលក្នុងសហគមន៍។ គណៈកម្មការប្រយុទ្ធនឹងជំងឺកូវីដ-១៩ថ្នាក់រាជធានី-ខេត្ត(គ.រ.ខ)ត្រូវចាត់វិធានការពង្រឹងការគ្រប់គ្រងប្រជាពលរដ្ឋធ្វើចំណាកស្រុក ដែលវិលត្រឡប់មកភូមិ-ឃុំវិញ និងត្រូវអនុវត្តវិធានការចត្តាឡីស័កនៅមណ្ឌលចត្តាឡីស័កឱ្យបានម៉ឺងម៉ាត់ ក្នុងករណីដែលរកឃើញថា ប្រជាពលរដ្ឋទាំងនោះ ពុំបានឆ្លងកាត់ការធ្វើចត្តាឡីស័កនៅតាមព្រំដែន។
ទី៣.ពង្រឹកការអនុវត្តវិធានការទាំងផ្នែករដ្ឋបាល ទាំងផ្នែកសុខាភិបាលសម្ដៅបង្ការ គ្រប់គ្រង និងកាត់ផ្ដាច់នូវខ្សែរយៈចម្លងនៃមេរោគកូវីដ-១៩ប្រភេទថ្មីDeltaនេះ នៅតាមមូលដ្ឋានដែលត្រូវបានរកឃើញអ្នកដែលបានឆ្លងជំងឺនេះ៕
