ភ្នំពេញ — ក្រសួងប្រៃសណីយ៍ និងទូរគមនាគមន៍ បានជូនដំណឹងថា កាលពីពេលថ្មីៗនេះ មានការកើនឡើងនូវការវាយប្រហារតាមអ៊ីនធឺណេតក្នុងទម្រង់ជាមេរោគចាប់ជំរិត ដែលមានគ្រោះថ្នាក់ខ្លាំងចំពោះស្ថាប័នរដ្ឋ និងឯកជន និងបុគ្គលម្នាក់ៗ។
បើតាមក្រសួងថា «មេរោគប្រភេទនេះគឺមានផលប៉ះពាល់ធ្ងន់ធ្ងរបំផុតដល់ប្រតិបត្តិការប្រចាំថ្ងៃ ដែលបណ្តាលមកពីទិន្នន័យ ប្រើប្រាស់ក្នុងដំណើរប្រតិបត្តិការត្រូវបានធ្វើកូដនីយកម្ម (Encryped) ដែលមិនអាចប្រើប្រាស់បាន»។ មេរោគប្រភេទនេះអាចឆ្លងចូលប្រព័ន្ធកុំព្យូទ័ររបស់អ្នកប្រើប្រាស់ ឬអង្គភាពតាមរយៈកត្តាមួយចំនួនដូចជា ការប្រើប្រាស់សូហ្វវែរ មិនមានអាជ្ញាប័ណ្ណ ការបើកឯកសារភ្ជាប់មកជាមួយអ៊ីមែល ការមិនបានធ្វើបច្ចុប្បន្នភាពទៅលើសូហ្វវែរ និងកម្មវិធីប្រើប្រាស់ជាដើម។
ក្រសួងប្រៃសណីយ៍បង្ហាញថា អ្នកប្រើប្រាស់ត្រូវធ្វើការបង់ប្រាក់ក្នុងទម្រង់ជារូបិយប័ណ្ណឌីជីថល (Digital Currency) ដែលភាគច្រើន គឺ BitCoin ដើម្បីទទួលបានឯកសារទាំងអស់នោះ ត្រឡប់មកវិញ។ ចោរព័ត៌មានវិទ្យាក៏ប្រើប្រាស់វិធីសាស្ត្រចាប់បង្ខំអ្នកប្រើប្រាស់ឱ្យបង់ប្រាក់ឱ្យបានឆាប់បើពុំនោះទេ ពួកចោរព័ត៌មានវិទ្យានឹងបញ្ចេញឯកសារទាំងអស់ដែលពួកគេបានលួច ដែលអាចធ្វើឱ្យប៉ះពាល់ជាខ្លាំងដល់កេរ្តិ៍ឈ្មោះរបស់ស្ថាប័ន និងទទួលរងនូវការពិន័យពីនិយតករផងដែរ។
វិធានការការពារចំពោះបញ្ហានេះក្រសួងប្រៃសណីយ៍បានណែនាំអ្នកអ្នកប្រើប្រាស់ ប្រើកម្មវិធីដែលមានអាជ្ញាប័ណ្ណត្រឹមត្រូវ (License Software ) ដោយចៀសវាងទាញយកកម្មវិធីតាមអ៊ីនធឺណិតដែលគ្មានប្រភពច្បាស់លាស់។
ធ្វើបច្ចុប្បន្នភាព ប្រព័ន្ធប្រតិបត្តិការ (Operating System) និងកម្មវិធីទាំងអស់ដែលអ្នកមាននៅក្នុងកុំព្យូទ័រ ឧបករណ៍ចល័តរបស់អ្នកឱ្យបានទៀងទាត់។ ដំឡើងកម្មវិធីកម្ចាត់ និងទប់ស្កាត់មេរោគ (Anti-virus និងធ្វើបច្ចុប្បន្នភាពឱ្យបានជាប្រចាំ)។ មិនត្រូវចុចលើតំណភ្ជាប់ (Link) ឬបើកឯកសារ attachment ដែលមិនស្គាល់ប្រភពច្បាស់លាស់នៅក្នុងអ៊ីមែល ធ្វើការថតចម្លងទុកឯកសារជាប្រចាំ (Regular Backup) និងបិទការតភ្ចាប់អ៊ីនធឺណិត (Offline)៕