កាលពីរសៀលថ្ងៃទី៦ ខែកក្កដា ម្សិលមិញ ព្រះរាជអាជ្ញារងខេត្តកំពង់ធំ សហការជាមួយកម្លាំងកងរាជអាវុធហត្ថ បានចុះទៅឃាត់គ្រឿងចក្រចំនួន៥គ្រឿង របស់ក្រុមហ៊ុនគ្រួសារសុខសាន្ត ក្រោយធ្វើសកម្មភាពឈូសឆាយដីគម្របព្រៃឈើរបស់រដ្ឋ ក្រោមល្បិចកន្ទេលធំបន្លំដេក។
បើតាមរបាយការណ៍របស់សមត្ថកិច្ចថា សកម្មភាពបង្រ្កាបគ្រឿងចក្រ ត្រូវបានធ្វើឡើង ចាប់ពីថ្ងៃទី៥ រហូតដល់ថ្ងៃទី៦ ខែកក្កដា ឆ្នាំ២០២១ ស្ថិតនៅក្នុងឃុំទ្រា ស្រុកស្ទោង ខេត្តកំពង់ធំ ព្រៃបម្រុងរក្សាទុករដ្ឋ ដោយរឹបអូសគ្រឿងចក្រចំនួន៥គ្រឿង ក្នុងនោះមានអ៊ិចស្កាវ៉ាទ័រ២គ្រឿង អាប៊ុល២គ្រឿង និងត្រាក់ទ័រ១គ្រឿង។
បើតាមប្រភពថា ក្រុមហ៊ុនគ្រួសារសុខសាន្ត នេះ បានបន្លំឈូសព្រៃអភិរក្ស លើសពីការស្នើសុំវិនិយោគ ដែលក្រុមហ៊ុននេះសុំច្បាប់វិនិយោគត្រឹមតែ ៧០ហិកតា តែក្រុមហ៊ុនបានឈូសឆាយដីព្រៃរបស់រដ្ឋដល់ទៅ ជាង២០០ហិកតា។
ចំពោះករណីឈូសឆាយដីព្រៃរបស់រដ្ឋនេះ លោក ព្រឹម រដ្ឋា អភិបាលរងខេត្តកំពង់ធំ ទទួលបន្ទុកផ្នែកការពារបង្រ្កាបព្រៃឈើ និងនេសាទ បានឆ្លើយបដិសេធ ដោយថាមិនបានដឹងពីការឈូសឆាយដីរបស់ក្រុមហ៊ុនគ្រួសារសុខសាសន្តឡើយ ចំណែកលោក ប៉ែន វណ្ណរិទ្ធ ប្រធានមន្ទីរកសិកម្មរុក្ខាប្រម៉ាញ់និងនេសាទ ខេត្តកំពង់ធំ បានឲ្យដឹងថា លោកនិងចុះស្រាវជ្រាវឲ្យលំអិតពី បញ្ហាឈូសឆាយដីព្រៃនេះ៕
