សៀមរាប — តំណាងអយ្យការអមសាលាដំបូងខេត្តសៀមរាប កាលពីថ្ងៃទី៧ កក្កដា ម្សិលមិញ បានដឹកនាំកម្លាំងចម្រុះ ចុះពិនិត្យដេប៉ូឈើមួយកន្លែង ស្ថិតនៅចំណុចភូមិរលួសខាងលិច ឃុំរលួស ស្រុកប្រាសាទបាគង ដោយរកឃើញឈើល្មើសច្បាប់មួយចំនួន។
លោកឧត្តមសេនីយ៍ត្រី ម៉ក់ ធារ៉ា ស្នងការរងទទួលការិយាល័យនគរបាលប្រឆាំងបទល្មើសសេដ្ឋកិច្ចនៅខេត្តសៀមរាប បានមានប្រសាសន៍ថា ប្រតិបត្តិការដែលធ្វើឡើងកាលពីថ្ងៃម្សិលមិញ ដឹកនាំដោយលោក ថេង សំណាង ព្រះរាជអាជ្ញារងអមសាលាដំបូងខេត្តសៀមរាប ដោយសហការជាមួយនគរបាលប្រឆាំងបទល្មើសសេដ្ឋកិច្ចខេត្តសៀមរាប និងខណ្ឌរដ្ឋបាលព្រៃឈើខេត្តសៀមរាប ចុះពិនិត្យដេប៉ូឈើឈ្មោះ តាំង សុខនី ត្រង់ចំណុចភូមិ រលួសខាងលិច ឃុំរលួស ស្រុកប្រាសាទបាគង ខេត្តសៀមរាប ហើយបានរកឃើញវត្ថុតាងឈើខុសច្បាប់ ប្រភេទសុក្រម ចំនួន ១៧៤ដុំ,ស្មើ៧៧៤២ម៉ែត្រគូប។
លោកថា ចំពោះវត្ថុតាងខាងលើត្រូវបានយកទៅរក្សាទុកនៅខណ្ឌរដ្ឋបាលព្រៃឈើស្រុកបន្ទាយស្រី ដើម្បីអនុវត្តបន្តនីតិវិធីតាមច្បាប់ស្តីពីព្រៃឈើ។
បើតាមប្រភពថា ក្នុងប្រតិបត្តិការណ៍នោះ សមត្ថកិច្ចបានឃាត់ខ្លួនមនុស្សចំនួន៣នាក់ ក្នុងនោះម្នាក់ឈ្មោះស្រេង ប្រណី ដែលជាអតីតថៅកែឈ្មួញឈើគ្រញូងប្រចាំទិសឧត្តរ និងគូកនចំនួន២នាក់ទៀត។
ដោយ៖ តាំង ហូ
