កាលពីយប់ថ្ងៃទី៧ កក្កដា ក្រសួងសុខាភិបាលកម្ពុជា បានចេញសេចក្តីប្រកាស ដោយដាក់ឲ្យអនុវត្តគោលការណ៍ណែនាំប្រតិបត្តិ ស្ដីពីការប្រើប្រាស់តេស្តរហ័សរកអង់ទីហ្សែនកូវីដ-១៩ សម្រាប់គ្រឹះស្ថានសុខាភិបាលឯកជន, ស្ថាប័ននិងអង្គភាពរដ្ឋមិនមែនសុខាភិបាល, បណ្តាច្រកទ្វារចេញ-ចូលប្រទេស, ក្រុមហ៊ុនឯកជន រោងចក្រ-សហគ្រាស និងទីកន្លែង អាជីវកម្មផ្សេងទៀត, និងសម្រាប់បុគ្គលឯកជន។
ឧបករណ៍តេស្តរហ័សរកកូវីដ១៩
លោក ម៉ម ប៊ុនហេង រដ្ឋមន្រ្តីក្រសួងសុខាភិបាលបានលើកឡើងថា ការសម្រេចដាក់ឲ្យប្រើប្រាស់តេស្តរហ័សរកអង់ទីហ្សែនកូវីដ១៩ សម្រាប់ស្ថាប័ននានានេះ គឺដោយផ្អែកតាមស្ថានភាព នៃការឆ្លងរាលដាល នៃជំងឺកូវីដ១៩ និងវត្តមាន នៃករណីនាំចូលមេរោគបំប្លែងខ្លួនថ្មី ប្រភេទដែលតា នៅក្នុងប្រទេសកម្ពុជា។
បើតាមការបញ្ជាក់ក្នុងសេចក្តីណែនាំ ឧបករណ៍តេស្តរហ័សរកអង់ទីហ្សែនកូវីដ១៩ ដែលកំពុងដាក់ឲ្យប្រើប្រាស់នៅលើពិភពលោក រួមទាំងឧបករណ៍ដែលប្រើប្រាស់នៅកម្ពុជា សុទ្ធតែមានចំណុចខ្សោយមួយ គឺមានករណីអ្នកផ្ទុកមេរោគកូវីដ១៩មួយចំនួនតូច ដែលឧបករណ៍តេស្តរហ័សរកអង់ទីហ្សែនកូវីដ១៩ រកមិនឃើញ ដោយចេញលទ្ធផលអវិជ្ជមានទៅវិញ។
ទោះយ៉ាងណាក៏ដោយ ឧបករណ៍តេស្តរហ័សអត់ទីហ្សែនកូវីដ១៩ គឺនៅតែជាឧបករណ៍យុទ្ធសាស្រ្តដែលអាចជួយកាត់ផ្តាច់ខ្សែបណ្តាញចម្លង នៃជំងឺកូវីដ១៩ ព្រមទាំងមានអត្ថប្រយោជន៍ច្រើន ដើម្បីរួមចំណែកដល់ការគ្រប់គ្រងការឆ្លងរាលដាល នៃជំងឺកូវីដ១៩ ព្រោះតែវាងាយស្រួលក្នុងការប្រើប្រាស់ ដោយមិនបាច់ឆ្លងកាត់មន្ទីរពិសោធន៍ ហើយមានសមត្ថកិច្ចអាចរកឃើញបានឆាប់រហ័ស នៅពេលអ្នកផ្ទុកមេរោគនេះកំពុងចេញរោគសញ្ញា ឬនៅពេលដែលចំនួនមេរោគកូវីដ១៩ដែលផ្ទុកក្នុងខ្លួនកើនឡើងខ្ពស់៕
