តាកែវ — កាលពីថ្ងៃសៅរ៍កន្លងទៅនេះ កម្លាំងនគរបាលស្រុកគិរីវង់ បានចុះបង្ក្រាបទីតាំងល្បែងស៊ីសងចំនួន២ទីតាំង ដោយបានរឹបអូសម៉ូតូប្រមាណជិត ៤០គ្រឿង។
ទីតាំងល្បែង២នៅស្រុកគិរីវង់ ត្រូវសមត្ថកិច្ចបង្រ្កាប
ទីតាំងល្បែងទាំង២នោះ ទីតាំង១ គឺជាករណី (ជល់មាន់តាមទូរទស្សន៍ Online) ស្ថិតនៅផ្ទះរបស់ឈ្មោះ សំ នួច ភេទស្រី អាយុ៤៧ឆ្នាំ មានទីលំនៅភូមិអណ្តូងធំ ឃុំគោកព្រេច ស្រុកគិរីវង់ ខេត្តតាកែវ ។
ក្នុងពេលចុះបង្ក្រាប អ្នកលេងទាំងអស់បានរត់ ហើយបានបន្សល់ទុកនូវម៉ូតូចំនួន១៨គ្រឿង ព្រមទាំងវត្ថុតាងពាក់ព័ន្ធមួយចំនួន ហើយត្រូវបានធ្វើការដកហូតយកមករក្សាទុកនៅប៉ុស្តិ៍នគរបាលរដ្ឋបាលឃុំគោកព្រេច ។
ទីតាំងទី២ ជាករណី (ជល់មាន់តាមទូរទស្សន៍Online) ស្ថិតនៅផ្ទះរបស់ឈ្មោះ កឹម ធូ ភេទប្រុស អាយុ៥០ឆ្នាំ មានទីលំនៅភូមិដីក្រហម ឃុំព្រៃរំដេង ស្រុកគិរីវង់ ខេត្តតាកែវ ។
ក្នុងពេលចុះបង្ក្រាប អ្នកលេងទាំងអស់នោះក៏បានរត់ខ្ចាត់ខ្ចាយអស់ ហើយបាន បន្សល់ទុកនូវម៉ូតូចំនួន២០គ្រឿង ។ ហើយសមត្ថកិច្ចក៏បានធ្វើការដកហូតយកមករក្សាទុកនៅប៉ុស្តិ៍នគរបាលរដ្ឋបាលឃុំព្រៃរំដេង។
បច្ចុប្បន្នសមត្ថកិច្ចកំពុងធ្វើការស្រាវជ្រាវរកមុខសញ្ញាដែលពាក់ព័ន្ធនូវការលេងល្បែងសុីសងទាំងអស់នេះ៕
