សារព័ត៌មានចិនបានចុះផ្សាយថា ភ្លៀងធ្លាក់ខ្លាំងអូសន្លាយ ធ្វើឲ្យកម្រិតទឹកនៅដងទន្លេលឿង ហូឆ្លងកាត់ទីក្រុង Zhengzhou ខេត្ត Henan ដោយកម្ពស់ទឹកបានឡើងខ្ពស់ ធ្វើឲ្យតំបន់ជាច្រើនក្នុងទីក្រុងត្រូវលិចលង់ដោយទឹកជំនន់។
រូបភាពបានបង្ហាញឲ្យឃើញថា ទឹកជំនន់បានជន់លិចស្ថានីយ៍រថភ្លើងជាច្រើនកន្លែង ហើយក៏មានករណីហូរគួចរថយន្តជាច្រើនគ្រឿងនៅតាមដងផ្លូវក្នុងទីក្រុង Zhengzhou ថែមទៀតផង។ តាមការប្រកាសរបស់មន្ត្រីក្នុងតំបន់បានឲ្យដឹងថា គ្រោះទឹកជំននបានសម្លាប់មនុស្ស ១២នាក់ផងដែរ។
ក្នុងពេលជាមួយគ្នានេះដែរ កម្រិតទឹកនៅទំនប់ Yihetan កើនឡើងខ្ពស់ គំរាមកំហែងដល់ការរស់នៅរបស់ពលរដ្ឋ ជាង៧លាននាក់ក្នុងតំបន់ ដោយទំនប់អាចនឹងបាក់គ្រប់ពេលវេលា។
ដើម្បីជួយដល់ពលរដ្ឋ រដ្ឋាភិបាលចិនបានសម្រេចដាក់ពង្រាយកម្លាំងទាហាន ២ម៉ឺននាក់ ទៅកាន់ទំនប់ Yihetan និងទំនប់ផ្សេងទៀតនៅទីក្រុង Henan ជាការត្រៀមលក្ខណៈជួយដល់ពលរដ្ឋ ពេលមានគ្រោះអាសន្នកើតឡើង ៕