ឧត្តរមានជ័យ — បើយោងតាមសេចក្តីរាយការណ៍បានឲ្យដឹងថា ក្រោយសារតែកំណើនពលករត្រឡប់មកពីថៃមានការកើនឡើង រហូតដល់រាប់រយនាក់ក្នុងមួយថ្ងៃៗតាមច្រកខេត្តឧត្តរមានជ័យ ឥឡូវខេត្តមួយនេះ លែងអាចទទួលពលករឲ្យធ្វើចត្តាឡីស័កបាន ហើយបានផ្ទេរទៅកាន់ខេត្តសៀមរាបវិញ។
ករណីនេះ បើតាមលោក ស៊ុន ចំណាន នាយកទីចាត់ការរដ្ឋបាលសាលាខេត្តសៀមរាប បានថ្លែងប្រាប់សារព័ត៌មានក្នុងស្រុកថា ខេត្តសៀមរាបគឺត្រូវបានចាត់តាំងជាខេត្តទី២ ដែលទទួលពលករវិលត្រឡប់មកពីប្រទេសថៃដោយសារតែខេត្តឧត្តរមានជ័យមិនមានកន្លែងទំនេរសម្រាប់ទទួលទៀតនោះទេ។
លោកថា យោងតាមសេចក្តីណែនាំថ្មីស្តីពីការបង្កើតគណៈកម្មការជាតិប្រយុទ្ធនឹងជំងឺកូវីដ-១៩ សម្រាប់ការគ្រប់គ្រងការចេញចូល និងការធ្វើចត្តាឡីស័ក អាជ្ញាធរខេត្តនឹងទទួលពលករចំណាកស្រុកដែលវិលត្រឡប់មកពីប្រទេសថៃ ឲ្យធ្វើចត្តាឡីស័ក។
បើតាមលោក ចំណាន បច្ចុប្បន្ននេះ អាជ្ញាធរបានទទួលពលករប្រមាណពី ២០០ ទៅ ៣០០ នាក់ក្នុងមួយថ្ងៃពីខេត្តឧត្តរមានជ័យឲ្យធ្វើចត្តាឡីស័ក។
«ទោះយ៉ាងណា យើងសង្កេតឃើញថាមណ្ឌលចត្តាឡីស័កនៅតាមបណ្តាស្រុកនានាក្នុងខេត្តសៀមរាបឥឡូវស្ទើរតែពេញអស់ហើយ»។
កាលពីដើមសប្តាហ៍នេះ ហ៊ុន ម៉ានិត ប្រធានអនុគណៈកម្មការគ្រប់គ្រងច្រកទ្វារចេញចូលប្រទេស និងការធ្វើចត្តាឡីស័ក បាននិយាយនៅក្នុងសារជាសំឡេងថា ចាប់ពីពេលនេះតទៅ ពលករចំណាកស្រុកដែលវិលត្រឡប់ ហើយស្ថិតក្រោមការធ្វើចត្តាឡីស័ករយៈពេល ២១ ថ្ងៃនៅឯព្រំដែន នឹងត្រូវបានអនុញ្ញាតឲ្យផ្ទេរទៅស្រុកកំណើត ឬរាជធានី ដើម្បីបញ្ចប់ការចត្តាឡីស័កសប្តាហ៍ចុងក្រោយ៕