កីឡា

TOKYO 2020៖ កីឡាក្រៅសាលមួយចំនួន គ្រោងផ្អាកការប្រកួត ពេលព្យុះទីហ្វុង Nepartak ទៅដល់ទីក្រុងតូក្យូ

ចុះផ្សាយ

ថ្ងៃ

ក្រោយទទួលព័ត៌មានព្យុះទីហ្វុង Nepartak កំពុងរំកិលទៅរកប្រទេសជប៉ុន ពិសេសទីក្រុងតូក្យូ ដែលកំពុងដំណើរការប្រកួតកីឡាអូឡាំពិករដូវកាលក្ដៅ ឆ្នាំ២០២០ (Tokyo Olympic Games 2020) គណៈកម្មការរៀបចំព្រឹត្ដិការណ៍ពិភពលោកនេះ បានជូនដំណឹងដល់អត្តពលិកទាំងអស់ ឲ្យបង្កើនការប្រុងប្រយ័ត្ន គ្រាដែលការប្រកួតកីឡាក្រៅសាលមួយចំនួន នឹងត្រូវផ្អាកការប្រកួត ពិសេសកីឡាលើទឹកតែម្ដង។

លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) និងជានាយបេសកកម្មក្រុមអត្តពលិកអូឡាំពិកកម្ពុជា បានមានប្រសាសន៍ពីទីក្រុងតូក្យូ នាល្ងាចថ្ងៃច័ន្ទនេះថា «ស្អែកនេះ ពេលព្យុះទៅដល់ទីក្រុងតូក្យូ កីឡាក្រៅសាលមួយចំនួនត្រូវផ្អាកការប្រកួត មានដូចជាកីឡាទូកក្ដោង ទូកកានូ និងអាចមានកីឡាអត្តពលកម្មផងដែរ ហើយប្រសិនបើកម្រិតខ្យល់ភ្លៀងខ្លាំង នឹងផ្អាកកីឡាក្រៅសាលទាំងអស់តែម្ដង។ ចំណែកកីឡាករ-កីឡាការិនីដែលស្នាក់នៅក្នុងភូមិកីឡាអូឡាំពិកវិញ ក៏ត្រូវបានប្រកាសឲ្យប្រុងប្រយ័ត្នផងដែរ»។

ផ្សាយពាណិជ្ជ.

តាមការរាយការណ៍របស់ទីភ្នាក់ងារឧត្តុនិយមជប៉ុន បានឲ្យដឹងថា ព្យុះទីហ្វុង Nepartak កំពុងចល័តពីភាគខាងជើង នៃមហាសមុទ្រប៉ាស៊ីហ្វិក ហើយអាចនឹងបក់បោកមកលើដែនកោះដ៏សំខាន់របស់ប្រទេសជប៉ុន ពិសេសទីក្រុងតូក្យូ ដែលកំពុងទទួលរៀបចំការប្រកួតកីឡាអូឡាំពិក ឆ្នាំ២០២០។ ដូច្នេះកម្មវិធីប្រកួតកីឡាមួយចំនួន នឹងត្រូវទទួលរងផលប៉ះពាល់ដោយឥទ្ធិពលអាកាសធាតុ នៃព្យុះនេះ ដែលត្រូវបានគេប៉ាន់ស្មានល្បឿនខ្យល់ប្រហែល ៣៥គីឡូម៉ែត្រក្នុងមួយម៉ោង ហើយគ្រោងធ្វើដំណើរទៅដល់ទីក្រុងតូក្យូ នៅរសៀលថ្ងៃអង្គារស្អែកនេះ៕

ប្រភព៖ CAMSOC

Advertisement
error: Content is protected !!